Ўзбекистонда 8—9 апрель кунлари ҳаво ҳарорати кескин пасайиб, республиканинг аксарият ҳудудларида ёмғир ва қор ёғди. Ўзгидромет ҳаво ҳароратининг бундай ўзгаришига изоҳ берди ва апрель ойида қандай об-ҳаво кузатилишини ҳақида маълумот берди.
Ўзгидрометнинг маълум қилишича, 7 апрель куни республиканинг баъзи жойларида ёмғир ёғди, 8 апрель куни ёмғир кучайган бўлса, 9 апрелга ўтар кечаси ва кундузи мамлакатнинг аксарият қисмида ёмғир қорга айланди. Фақат Қорақалпоғистон ва Хоразм вилоятида ёғингарчилик кузатилмаган.
Қайд этилишича, республиканинг баъзи ҳудудларида шамолнинг тезлиги сониясига 15—20 метргача, Қорақалпоғистон Республикаси ва Навоий вилоятида эса сониясига 25 метргача кучайган.
Ҳаво ҳарорати 8 апрель куни кундузи +3… +8 даражагача, 9 апрелга ўтар кечаси эса 0…+3 даражагача, баъзи жойларда эса -2… -1 даражагача тушган.
Республиканинг марказий ва жанубий вилоятларида ёғган қордан кейин баландлиги 2—8 сантиметр, айрим жойларда 10—20 сантиметргача бўлган беқарор қор қатлами юзага келган. Тошкентда 9 апрель куни қор қалинлиги 15 сантиметрни ташкил қилган.Республикада кузатилган кучли ёғингарчилик, шамол ва ҳароратнинг кескин пасайиши Россиянинг Европа ҳудуди бўйлаб ҳосил бўлган совуқ ва нам ҳаво массасининг Волгабўйи орқали Ўзбекистон ҳудудига кириб келиши сабабли кузатилган.
Ўзгидрометнинг қайд этишича, апрель ойидаги қор ёғиши ва қор қопламининг пайдо бўлиши Ўзбекистон иқлими учун жуда кам учрайдиган ҳодиса ҳисобланади. Охирги марта бундай ҳолат 2014 йилда кузатилган, аммо ўшанда қор камроқ ёғган. Тошкентда қор баландлиги атиги 2 сантиметрга етган.
Мавзуга доир: Баҳорнинг иккинчи ойида Тошкентда ёғган қор – суратларда
Ўзгидромет вакилининг маълум қилишича, бутун кузатувлар давомида Тошкентда энг кеч қор ёғиши ҳодисаси 1989 йилнинг 30 апрелида қайд этилган. Мазкур қор ёғиши ва май ойининг дастлабки кунларида кузатилган совуқ турли хил қишлоқ хўжалиги экинларига катта зарар етказган.
Маълум қилинишича, апрель ойида об-ҳаво жуда ўзгарувчан бўлади, аммо жорий йилнинг апрель ойида юқоридаги каби жараённинг такрорланиши эҳтимоли ҳам. Яқин кунларда ҳарорат кескин кўтарила бошлайди ва нисбатан илиқроқ ёмғирлар кузатилади.
Ёғингарчилик вақтидаги кучли шамолнинг юзага келишига ҳаво оқимлари ҳудудидаги ер юзасида атмосфера босимининг кескин ўзгариши сабаб бўлади. Антитциклон ўтаётган вақтда ҳаво оқими босим юқори бўлган ҳудуддан босим паст бўлган ҳудудга йўналади.
Аввалроқ Ўзбекистонда кучли шамол оқибатида камида 63 минг хонадон электр таъминотисиз қолгани ҳамда апрель қори Тошкент кўчаларини қулаган дарахтларга тўлдиргани ҳақида хабарлар берилган эди.
Изоҳ (0)