Қирғизистонда коронавирус тарқатганлик юзасидан биринчи жиноий иш қўзғатилди. Бу ҳақда Республика COVID-19 га қарши кураш бўйича штаби маълумотига таяниб, «РИА Новости» хабар берди.
Хабарга кўра, Ўш вилоятида истиқомат қиладиган гумонланувчи карантин қоидаларини бузгани учун ҳибсга олинган. Текширув натижасида унинг коронавирус юқтириб олгани маълум бўлди.
«Афсуски, қўлга олинган фуқаро коронавирус юқтириб олганлигини қариндошларидан, тенгдошлари, ҳамкасбларидан ҳам яширган ва инфекцияни уларга ҳам юқтирган. Айни вақтда у махсус карантин ҳудудида даволанмоқда. Тузалганидан кейин 5 йил муддатга озодликдан маҳрум қилинади», — дея хабар қилган штаб вакили.
Қирғизистонда коронавирус юқтириб олганлар сони 7 апрель ҳолатига кўра, 228 нафарга етган, тўрт нафар одам вафот этган. Касалланганлар орасида тиббиёт ходимлари ҳам бор. COVID-19 эпидемияси сабаб мамлакатда фавқулодда ҳолат эълон қилинган. Бир нечта шаҳарда, жумладан, пойтахтда фавқулодда ҳолат режими ҳукм сурмоқда.
Қирғизистонда коронавирус билан боғлиқ биринчи ўлим ҳолати 3 апрель куни қайд этилган, ундан аввал 1 апрель куни мамлакат соғлиқни сақлаш вазири ва бош вазир ўринбосари ўз лавозимларидан озод этилганди.
Жаҳон соғлиқни сақлаш ташкилоти (ЖССТ) 11 март куни янги турдаги коронавирус инфекцияси COVID-19 тарқалиши пандемия даражасига етганини эълон қилган. ЖССТ берган сўнгги маълумотларга кўра, дунёда 1,21 миллион нафардан кўпроқ одам вирус юқтириб олган, 67,6 минг киши инфекция келтириб чиқарган касаллик оқибатида вафот этган.
Изоҳ (0)