Андижон шаҳрида карантин қоидаларини бузган фуқароларнинг велосипед ҳамда мототранспорт воситалари олиб қўйилиб, жарима майдонига жойлаштирилмоқда. Бу ҳақда «Дарё» мухбири Умиджон Мамарасулов хабар берди.
Андижон ИИБ ахборот хизматининг маълум қилишича, Андижон шаҳрида мақсадсиз мототранспорт ҳамда велосипедларда белгиланган чекловларни бузиб ҳаракатланаётган фуқароларни аниқлаш мақсадида бошқарма соҳавий хизматлари ҳамда Миллий гвардия ходимларидан иборат 10 та ишчи гуруҳи ташкил этилган.
Таъкидланишича, ишчи гуруҳ 6 апрель куни кўчада велосипед ҳамда мототранспорт воситаларини бемақсад бошқариб юрган 407 нафар фуқарони аниқлаб, уларга нисбатан маъмурий баённома расмийлаштирган.
Жарима майдончасидан жой олаётган транспорт воситалари, скутер ва велосипедлар карантин муддати тугаганидан сўнг ўз эгаларига қайтарилиши тушунтирилмоқда.
Эслатиб ўтамиз, 6 апрель куни соат 6:00 дан эътиборан Тошкент ва Нукус шаҳарлари ҳамда вилоят марказларида мототранспорт (скутер) ҳамда велосипедда ҳаракатланиш карантин даврида вақтинча чекланди.
Бунда фақатгина ҳаётий зарур эҳтиёжлар — озиқ-овқат, дори-дармон, тиббий буюм ва воситалар харид қилиш, шифокор кўригига мурожаат этиш, шунингдек, иш жойига бориш ва келиш учун рухсат этилади.
Мавзуга доир:
Изоҳ (0)