Қирғизистонда коронавирус билан касалланганлар сони 228 кишига етди

Қирғизистонда 7 апрель ҳолатига кўра, яна 12 кишида коронавирус аниқланган. Бу ҳақда мамлакат соғлиқни сақлаш вазири Сабиржан Абдукаримовга таяниб, Akipress хабар берди.

Аввалроқ Қирғизистонда коронавирусга чалинганлар 216 кишига етиб, яна икки киши вафот этгани ҳақида хабар берилганди.

Вазирнинг сўзларига кўра, 12 кишининг барчаси Ўш вилоятидан. «Афсуски, касалланганларнинг етти нафари тиббиёт ходими: 4 шифокор ва 3 нафар ҳамшира. Уларнинг бир қисми обсервациядаги одамлар билан ишлаган бўлса, қолган қисми бошқа бир касалнинг ҳамкасблари. Беш кишидан бири Умрадан келган, қолганлари у билан алоқада бўлган», — дейди вазир.

Коронавирус билан касалланган шифокорлар аҳволи қониқарли. Уларда клиник белгилар кузатилмаган. Умумий ҳисобда Қирғизистонда коронавирус билан касалланганлар сони 228 кишига етди.

Аввалроқ Қирғизистоннинг йирик шаҳарлари аҳолисига соат 20:00 дан кейин кўчага чиқиш тақиқлангани, мамлакатдан ун ва макаронларнинг олиб чиқиб кетилишига, Бишкекда шахсий автомобилдан фойдаланишга тақиқ қўйилгани ҳақида хабар берилганди.

Эслатиб ўтамиз, Ўзбекистонда коронавирус инфекцияси билан касалланганлар сони 457 нафарга етди. Мамлакатда илк касалланиш ҳолати қайд этилганидан бери 30 нафар бемор соғайган ва икки киши вафот этган.