Сингапур ҳукумати коронавирус сабабли мамлакатнинг ҳар бир фуқаросига компенсация тўланишини маълум қилди

Сингапур расмийлари коронавирус сабабли бизнес ва фуқароларга кўрсатиладиган моддий ёрдамнинг учинчи пакети ҳақида маълум қилди. Бу ҳақда мамлакатда касалланганлар сонининг кескин ошгани сабабли карантиннинг қаттиқлашишидан бир кун олдин, яъни 6 апрель куни маълум қилинди, деб ёзмоқда «РБК».

Мамлакат ҳукуматининг қарорига мувофиқ, Сингапурнинг 21 ёшдан ошган ҳар бир фуқароси 417 доллар миқдорида моддий ёрдам олади ва ундан яқин вақт ичида фойдаланиши мумкин бўлади. Бу кўплаб компанияларнинг 7 апрелдан карантинга ёпилиши шароитида фуқароларга ёрдам беришига умид билдирилмоқда.

Компаниялар ҳам моддий ёрдам олади. Ҳукумат компанияларнинг апрель ойи учун иш ҳақи харажатларини қоплаб беришни ваъда қилган. Турли ҳисоб-китобларга кўра, бунинг барчаси учун 2,9 миллиард доллар керак бўлади ва улар захира жамғармасидан олинади.

Аввалроқ Сингапур ҳукумати корхоналар ва аҳолини қўллаб-қувватлаш бўйича бир қатор чораларни маълум қилган. Февраль ойида мамлакат расмийлари барча фуқароларга 60—100 доллардан тўлаб берилишини кафолатлаган эди. Март ойида эса бу сумма уч бараварга оширилиши ваъда қилинди. Дастлаб, компенсация тўловларини август—сентябрь ойларида тўлаш режалаштирилган эди. Бироқ кейинроқ ҳукумат режаларини қайта кўриб чиқди ва тўловларни апрель ойидан бошлашга қарор қилди.

Ўз банк ҳисобрақамлари ҳақида маълумотларни берган фуқароларга пуллар ўтказиб берилади, аҳолининг бир қисмига эса нақд кўринишда тўловлар амалга оширилиши маълум қилинган.

Сингапур молия вазири ихтиёрий равишда бу тўловлардан воз кечган фуқароларга миннатдорлик билдирган. Унинг сўзларига кўра, орттирилган пуллар кўпроқ муҳтож бўлган фуқароларга ёрдам бериш учун ишлатилади. Вазир барча хоҳловчиларни махсус жамғармага хайрия қилишга чақирган.

Сингапур дунёда коронавирус авж олган дастлабки мамлакатлардан бири бўлди. Март ойининг бошида касалланганлар сонининг ортиши секинлашди, бироқ 5 апрель куни шаҳарда 120 та янги ҳолат қайд этилди ва шу пайтгача кузатилган энг юқори натижа бўлди. Сингапурда коронавирусга чалинганлар сони 1309 кишини ташкил этмоқда, касалликдан олти киши вафот этган.

Аввалроқ, Японияда 7 апрелдан бошлаб фавқулодда ҳолат эълон қилиниши ҳамда пандемия сабабли даромади пасайиб кетган ҳар бир оилага тахминан 2,7 минг доллардан тўланиши ҳақида хабар берилган эди.