Аввал хабар берганимиздек, 6 апрелдан бошлаб Республика махсус комиссияси томонидан қўшимча чора-тадбирлар белгиланди.
Жумладан, «ўзини яккалаш» ҳаёт тарзи Нукус ва Тошкент шаҳарлари ҳамда вилоятлар марказларида мажбурий равишда жорий этилди.
Фуқароларнинг яшаш ҳудудидаги савдо нуқталарида биринчи галдаги ҳаётий зарур бўлган эҳтиёжлари, шифокор кўригига мурожаат этишдан бошқа мақсадларда чиқиши қатъиян чекланди (иш жойига бориши ва келиши билан боғлиқ ҳолатлар бундан мустасно). Ҳаракатланишда ҳамда савдо дўконлари ва бошқа жойларда икки метрлик ижтимоий масофани сақлаш талаб этилди. Ушбу талабларни бузган шахслар қонунчиликка мувофиқ тегишли жавобгарликка тортилиши мумкинлиги бегиланди.
Шу билан бирга, Бош прокуратура фуқаролардан кундалик юритишни сўради. Ҳар бир фуқаро қачон, ким билан, қаерда ва қай тарзда мулоқот қилганини ёзиб бориши мақсадга мувофиқ эканлиги маълум қилинди.
Шунингдек, Тошкент ва Нукус шаҳарлари ҳамда вилоят марказларида истисно ҳолатлардан ташқари мототранспорт (скутер) ҳамда велосипедда ҳаракатланиш карантин даврида вақтинча чекланди.
Ички ишлар органлари йўл-патрул хизмати ходимлари томонидан карантин даврида автотранспорт воситасини махсус рухсатномасиз бошқарганлик учун транспорт воситаси жарима майдончасига жойлаштириш йўли билан ушлаб турилиши хабар қилинди.
Тошкент шаҳар ИИББ Йўл ҳаракати хавфсизлиги бошқармаси ва Тошкент шаҳар Давлат хизматлари марказлари ўзаро ҳамкорликда ўтказган назорат-рейд тадбирлари натижасида 52 та стикер бекор қилиниб, автомашиналар жарима майдонига қўйилди.
Шунингдек, 6 апрелдан бошлаб Тошкент шаҳрининг 11 та туманидаги 514 та маҳалла қошида «Жамоатчилик назорати маскани» ташкил этилди.
«Дарё» мухбири юқорида қайд этилган янги ўзгаришлардан сўнг Тошкентда қандай муҳит ҳукм сураётганини кадрларга муҳрлади.
Эслатиб ўтамиз, Ўзбекистонда коронавирусга чалинганлар сони 504 кишига етган. Бугунги кунгача 30 нафар бемор вирусдан тўлиқ соғайгани қайд этилди.
Бўм-бўш Амир Темур хиёбони ҳудуди.
Миробод ва Яккасарой туманларини ажратиб турувчи пост.
Изоҳ (0)