Koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha Respublika maxsus komissiyasining 4-apreldagi yig‘ilishida bir qator qo‘shimcha chora-tadbirlar belgilandi.
Unga ko‘ra, istisno tariqasida ichki ishlar organlari yo‘l-patrul xizmati xodimlari tomonidan karantin davrida avtotransport vositasini maxsus ruxsatnomasiz boshqarganlik uchun transport vositasi jarima maydonchasiga joylashtirish yo‘li bilan ushlab turiladi.
Qayd etishlaricha, ushbu yangi tartib “karantin talablari ijrosini so‘zsiz ta’minlash hamda maxsus ruxsatnomasi mavjud bo‘lmagan holda harakatlanayotgan avtotransport vositalari tomonidan huquqbuzarlik davom ettirilishiga yo‘l qo‘ymaslik maqsadida” joriy etilmoqda.
Mavzuga doir:
4-aprel kuni Davlat xizmatlari agentligi avtomobillar harakatlanishi uchun maxsus ruxsatnomalar olish bo‘yicha arizalar qabuli 6-aprel soat 18:00 gacha to‘xtatilganini e’lon qildi. Ma’lumotlarga ko‘ra, 4-aprel 17:00 holatiga ko‘ra maxsus ruxsatnoma olish uchun 165 mingdan ortiq ariza kelib tushgan.
Arizalar asosida O‘zbekiston bo‘yicha 23 546 ta ruxsatnoma berilgan, 81 241 ta ariza rad etilgan, 10 004 ta ariza esa ariza beruvchilar tomonidan qaytarib olingan. Ularning aksariyati DXA rahbarining “dostavka”chi aylangan “inomarkalar” egalariga ochiq murojaatidan so‘ng qaytarib olindi.
Ayni vaqtda oziq-ovqat yetkazib berish (“dostavka”)ga ixtisoslashgan kompaniyalar maxsus ruxsatnomalarni olishda qiyinchilikka duch kelayotganini ma’lum qilgan edi. Eslatib o‘tamiz, O‘zbekistonda karantin davri qachon tugashi noma’lum.
Izoh (0)