Жаҳон банки Ўзбекистонга коронавирус пандемиясининг оқибатлари билан курашиш учун 1,2 миллиард доллар ажратиш масаласини кўриб чиқмоқда. Бу ҳақда Ўзбекистон Инвестициялар ва ташқи савдо вазирлиги хабар берди.
Маълум қилинишича, 6 апрель куни Ўзбекистон бош вазири ўринбосари, инвестициялар ва ташқи савдо вазири Сардор Умурзоқов Жаҳон банкининг Европа ва Марказий Осиё минтақаси бўйича вице-президенти Сирил Мюллер билан бўлиб ўтган видеоконференция кўринишидаги суҳбатда мазкур масалани муҳокама қилган.
Вазирликнинг таъкидлашича, томонлар аҳолини коронавирусдан ҳимоя қилишга, корхоналар, биринчи навбатда, кичик ва ўрта бизнес субъектларини, қишлоқ хўжалик маҳсулотлари ишлаб чиқарувчилар ва хусусий тадбиркорларни қўллаб-қувватлашга қаратилган биргаликдаги истиқболли чораларни муҳокама этди.
«Сирил Мюллер Ўзбекистон Президенти бошчилигида аҳолининг ижтимоий ҳимоя даражасини ошириш ва мамлакатда иқтисодий фаолликни қўллаб-қувватлаш бўйича ўзини оқлаган чораларни юқори баҳолади», — дейилади вазирлик хабарида.
Вазирликнинг маълум қилишича, Сирил Мюллер Жаҳон банки томонидан шакллантирилган 14 миллиард доллар миқдоридаги «Стратегик тайёрлик ва жавоб дастури» маблағларининг бир қисмини Ўзбекистоннинг инқирозга қарши дастурини қўллаб-қувватлаш учун мобилизация қилиш ниятида эканлигини билдирган.
Қайд этилишича, банк раҳбарияти ҳозирги вақтда Ўзбекистон соғлиқни сақлаш тизимини, ижтимоий ҳимоя институтлари ва муассасаларини молиялаштириш ҳамда бюджетни қўллаб-қувватлаш учун 1,2 миллиард доллар миқдорида маблағларни оператив ажратиш масаласини кўриб чиқмоқда. Мазкур маблағлар жорий йилнинг март ойида тасдиқланган коммунал инфратузилмани модернизация қилиш лойиҳаларини ва қишлоқ хўжалик маҳсулотлари ишлаб чиқарувчиларини молиялаштириш учун мўлжалланган 700 миллион доллар миқдоридаги кредит линияларига қўшимча ҳисобланиши айтилган.
Аввалроқ, Ўзбекистон коронавирусга қарши кураш учун Осиё тараққиёт банкидан 1 миллиард доллар сўраган эди.
Эслатиб ўтамиз, Ўзбекистонда коронавирус сабабли юзага келадиган иқтисодий муаммоларга қарши курашиш учун Инқирозга қарши жамғарма тузилиб, унга 10 триллион сўм ажратилиши маълум қилинган. Коронавирус сабабли зарар кўрадиган соҳалардаги корхоналарнинг кредит муддатларини узайтириш, туристик йиғимлар ундиришни вақтинча тўхтатиш бўйича чоралар кўрилган. Шунингдек, жисмоний шахслар ва ЯТТларнинг кредит тўловларини қайтаришда ҳам имтиёзлар берилди. Президент Шавкат Мирзиёев 3 апрель куни коронавируснинг салбий иқтисодий оқибатларига қарши кураш учун кўриладиган янги чоралар ҳақида маълум қилди, корхоналарга бир қатор солиқ имтиёзлари тақдим этилди.
Изоҳ (0)