Ўзбекистонда карантин шароитида транспорт воситаларидан фойдаланиш учун талаб қилинадиган махсус рухсатномани олиш учун жорий йилнинг 6 апрель куни соат 18:00 га қадар Давлат хизматлари марказларига жами 168 521 та ариза келиб тушган. Уларнинг 163 444 таси кўриб чиқилиб, 28 073 таси қаноатлантирилган, 135 371 таси рад этилган. Бу ҳақда Давлат хизматлари агентлиги маълум қилди.
Агентлик томонидан қайд этилишича, стикерлардан белгиланган мақсадларга зид равишда фойдаланмаслик ёки уларни суиистеъмол қилмаслик ҳақида бир неча марта берилган расмий огоҳлантиришларга қарамасдан бу каби ҳолатлар кўплаб кузатилмоқда.
Хабар берилишича, Тошкент шаҳар ИИББ Йўл ҳаракати хавфсизлиги бошқармаси ва Тошкент шаҳар Давлат хизматлари марказлари ўзаро ҳамкорликда автотранспорт воситалари учун берилган стикерлардан мақсадли фойдаланиш бўйича 6 апрель куни соат 20:00 дан кейин ўтказган назорат-рейд тадбирлари натижасида 52 та стикер бекор қилиниб, автомашиналар жарима майдонига қўйилди.
Агентликнинг маълум қилишича, бу каби назорат-рейд тадбирлари мунтазам равишда республиканинг барча ҳудудларида ўтказилади. Аввалроқ Тошкентда «стикер»сиз юрган 152 та автомобиль жарима майдончасига жойлаштирилгани ҳақида хабар қилинган эди.
Эслатиб ўтамиз, стикер олмоқчи бўлган «иномарка»лар очиқланиши айтилгандан сўнг 9 мингга яқин ариза қайтариб олинган эди. Ўзбекистонда махсус рухсатномасиз ҳаракатланаётгани аниқланган автомобиллар карантин охиригача жарима майдончасига жойлаштирилади.
Изоҳ (0)