Фарғона вилоятида 70 дан ортиқ «иномарка» ҳайдовчиларининг махсус стикер олиш учун курьер сифатида топширган аризалари рад этилган, — дея хабар беради «Дарё» мухбири Азизжон Эрматов.
Қайд этилишича, жорий йил 4 апрель соат 18:00 га қадар Фарғона шаҳар давлат хизматлари марказига фуқаролар ва тадбиркорлик субъектлари томонидан автомашинада ҳаракатланиш рухсатномасини олиш учун 14 минг 69 та ариза келиб тушган.
Аризаларнинг 12 минг 157 таси белгиланган мезонларга мос келмагани учун рад этилган. 1056 та автомашина ҳайдовчисига махсус рухсатнома берилган.
Давлат хизматлари агентлиги Фарғона вилояти бошқармаси бошлиғи Раъно Бойқўзиеванинг таъкидлашича, аризаларни саралаш, ЙҲХБ билан биргаликда кўриб чиқиш ва асослантирилган қарорлар қабул қилиш учун 4 апрель соат 18:00 дан бошлаб аризалар қабули вақтинчалик тўхтатилган.
Бугун, 7 апрелдан бошлаб автотранспорт воситалари учун берилган стикерлардан мақсадли фойдаланиш устидан махсус рейд ўтказилмоқда. Шу муносабат билан Давлат хизматлари маркази махсус рухсатномалар нима мақсадда берилгани тўғрисидаги маълумотларни ЙПХ ходимларига тақдим этган.
Изоҳ (0)