АҚШ юстиция вазирлиги футбол бўйича 2018 ва 2022 йилги Жаҳон Чемпионатлари мезбонларини аниқлашда коррупцияга йўл қўйилганини айтмоқда.
Таъкидланишича, ФИФА собиқ вице-президенти Тринидад ва Тобагодан бўлган Жек Уорнер ўзининг овозини Россияга бериш учун сотиб олинган. Шунингдек, Гватемала вакили Рафаэл Сальгерога ҳам пора таклиф қилинган.
Бразилия футбол федерацияси президенти Рикардо Тейшейра, КОНМЕБОЛ собиқ раҳбари, 2019 йилда вафот этган парагвайлик Николас Леос ва яна бир номи сир тутилган ижроқўм вакили ЖЧ—2022 мусобақаси мезбонини аниқлаш вақтида пора олган.
Жек Уорнер 5 миллион доллар миқдорида пора олган. Салгерога 1 миллион таклиф қилинган. Вазирлик айбловида мазкур пул берилган ёки берилмагани очиқланмаган.
2010 йил ноябридан 2011 йилнинг апрелига қадар Уорнерга йигирмадан ортиқ пул ўтказмалари орқали 5 миллион доллар берилган. Тўловлар Кипр ва Виргиния оролларида рўйхатдан ўтган офшор компаниялар орқали бўлган.
Шунингдек, 2010 йилда Уорнернинг ассистенти электрон хат қабул қилиб олган, унда Уорнер «келишилган ишни амалга ошириш»и кераклиги таъкидланган.
Эслатиб ўтамиз, Уорнер 2015 йилда футболга оид ҳар қандай фаолиятдан бир умрга четлатилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)