Ўзбекистон тижорат банкларига Марказий банкка ўтказилиши лозим бўлган мажбурий резервлар миқдорининг 35 фоизини банкларнинг вакиллик ҳисобварағида қолдиришга рухсат этилди. Бу ҳақда Марказий банк матбуот хизмати хабар берди.
Қайд этилишича, Марказий банк бошқаруви 2020 йил 1 апрелдан эътиборан тижорат банкларининг Ўзбекистон Марказий банкида депозитга ўтказиладиган мажбурий резервлари миқдорига нисбатан ўртачалаш коэффициентини ошириш бўйича қарор қабул қилди.
Унга кўра, Ўзбекистондаги жорий макроиқтисодий шароитлардан келиб чиқиб, банк тизими ликвидлигини қўллаб-қувватлаш ва тўлов тизимининг барқарор ишлашини таъминлашда мажбурий резервлаш инструментининг самарадорлигини ошириш мақсадида 2020 йилнинг 1 апрелидан бошлаб мажбурий резервлар миқдорига нисбатан амалдаги 0,25 ўртачалаш коэффициенти 0,35 гача оширилди.
«Бунда мажбурий резервларнинг норматив миқдорига нисбатан ўртачалаш коэффициентини белгилаш орқали Марказий банкка ўтказилиши лозим бўлган мажбурий резервлар миқдорининг 35 фоизини банкларнинг вакиллик ҳисобварағида қолдиришга рухсат этилади. Бу ўз навбатида, тижорат банкларининг ликвидлилигини қўллаб-қувватлашга хизмат қилади», — дейилади хабарда.
Таъкидланишича, тижорат банкларининг Марказий банкда резерв сифатида шакллантириладиган мажбурий резервлар нормативлари ўзгаришсиз, миллий валютадаги депозитлар учун 4 фоиз ҳамда чет эл валютасидаги депозитлар учун 14 фоиз миқдорида қолдирилди.
Марказий банк келгусида банк тизимидаги ликвидлиликнинг жорий ҳолати таҳлилидан келиб чиқиб, ўртачалаш коэффициентини босқичма-босқич ошириб боради.
Изоҳ (0)