Қашқадарё ҳокими Зоир Мирзаевга икки нафар ўринбосар тайинланди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилмоқда.
Таъкидланишича, вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари лавозими такомиллаштирилиб, молия-иқтисодиёт ва камбағалликни қисқартириш масалалари бўйича биринчи ўринбосар — вилоят иқтисодий тараққиёт ва камбағалликни қисқартириш бош бошқармаси бошлиғи лавозими жорий этилган. Ва мазкур лавозимга айни кунга қадар биринчи ўринбосар сифатида ишлаб келган Ўткир Бўтаевнинг ўзи тайинланган.
Шунингдек, Рустам Йўлдошев эса вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига тайинланган.
Айтилишича, Рустам Йўлдошев мазкур тайинловга қадар Вазирлар Маҳкамаси ҳузуридаги таълим сифатини назорат қилиш давлат инспекциясининг Самарқанд вилояти бўлими бошлиғи вазифасида ишлаб келган.
Таъкидлаш жоиз, Зоир Мирзаевнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида фаолият юритган Долли Аллаев ҳоким ўринбосари — маҳалла ва оилани қўллаб-қувватлаш бошқармаси бошлиғи лавозимига ўтказилганди.
Изоҳ (0)