Ўзбекистонда ҳозиргача аниқланган 390 та коронавирусга чалиниш ҳолатларининг 170 таси Тошкент шаҳри ва Тошкент вилояти ҳудудида аниқланган. Бу ҳақда Соғлиқни сақлаш вазирлиги хабар бермоқда.
Шунингдек, ҳозиргача Фарғона вилоятида 64 нафар, Андижон вилоятида 61 нафар, Наманган вилоятида 48 нафар, Бухоро вилоятида 19 нафар, Хоразм вилоятида 18 нафар, Қашқадарё вилоятида 6 нафар, Навоий вилоятида 2 нафар, Қорақалпоғистон Республикасида 2 нафар коронавирусга чалинган фуқаро аниқланган.
Изоҳ: «Фарғона вилоятида коронавирусга чалинган 64 нафар фуқаро аниқланди», дегани уларнинг бари асли фарғоналик эканини англатмайди — ҳудудлардаги беморларнинг катта қисми хориждан Ўзбекистонга қайтарилган ватандошлар бўлиб, улар орасида асли бошқа ҳудудлардан бўлганлар ҳам бор (масалан, 31 март ҳолатига Фарғонада аниқланган 26 бемордан фақат 9 нафари фарғоналик эди). Соғлиқни сақлаш вазирлиги беморларнинг айнан қайси ҳудудларга мансублиги бўйича ҳам алоҳида рақамларни эълон қилиб келмоқда, мисол учун, 6 апрель соат 12:00 ҳолатига 390 беморнинг 24 нафари фарғоналикдир.
Маълумот учун, Ўзбекистонда ҳозиргача коронавирус инфекцияси оқибатида икки киши вафот этди, 30 киши эса касалликдан соғайишга муваффақ бўлди. Айни вақтда етти нафар беморнинг аҳволи оғир эканлиги, улардан икки нафари сунъий нафас олиш аппаратига улангани маълум қилинган.
Изоҳ (0)