Навоий вилояти ИИБ ППХ ва ЖТСБ ходимларининг тезкор ҳаракати туфайли 1 ёшли қизнинг ҳаёти сақлаб қолинди, деб хабар бермоқда вилоят ИИБ матбуот хизмати.
Қайд этилишича, 3 апрель куни соат тахминан 21:00 лар атрофида Навоий вилоятининг Кармана туманидан Навоий шаҳри ҳудудига ўтувчи чегара постида ҳаракатланиб келаётган енгил машина тунги навбатчиликда ўз хизмат вазифасини ўтаётган ППХ ва Миллий гвардия ходимларининг эътиборини тортган.
Машина ходимлар томонидан йўл четига тўхтатилганда, фуқаро Л.Й. рафиқаси билан биргаликда ҳушсиз ҳолатдаги 1 ёшли қизини шифохонага олиб бормоқчи эканлиги маълум бўлган.
Қизчанинг ҳаёти тобора хавф остида қолаётганлигини пайқаган ходимлар ўша вақтнинг ўзида зудлик билан унга биринчи тез тиббий ёрдам кўрсатган ва ўз хизмат машинасида тезлик билан ҳаракатланиб уларни вилоят шошилинч тез тиббий ёрдам шифохонасига олиб борган.
Мазкур ҳолат юзасидан вилоят шошилинч тез тиббий ёрдам шифохонасининг олий тоифали шифокори Бобомурод Пардаевнинг маълум қилишича, бемор 39,5 даража юқори иситма ҳароратида ҳушсиз ҳолатда шифохонага олиб келинган. 2 дақиқалик кечикиш унинг ҳаётини аянчли якунлаши мумкин эди. Айни пайда қизча ҳаётга қайтган унинг саломатллиги яхши ҳамда шифокорлар назоратида.
Эслатиб ўтамиз, коронавирус инфекцияси тарқалишига қарши кураш доирасида Тошкент шаҳри ва бир қатор шаҳарларга транспортнинг кириш-чиқиши чекланди, вилоятлараро транспорт ҳаракати тўхтатилди. Бундан ташқари, шахсий автомобилда махсус рухсатномасиз ҳаракатланиш тақиқланди, фуқароларга заруратсиз уйдан чиқмаслик тавсия этилди.
Изоҳ (0)