Франция пойтахти Париж шаҳри яқинида жойлашган мамлакатдаги энг йирик Ранжис бозорининг биноларидан бири коронавирус сабабли моргга айлантирилади. Бу ҳақда Le Parisien хабар берди.
Франциянинг қишлоқ хўжалиги маҳсулотларини тақсимлаш билан шуғулланувчи мазкур бозорнинг биноларидан бири яқин кунлар ичида дафн маросимлари хизматларининг ишини енгиллаштириш учун моргга айлантирилади. Қайд этилишича, бунга ўхшаш ҳолат 2003 йилда, кучли жазирама сабабли ўлимлар сони ортиб кетган вақтда ҳам кузатилган.
Нашрнинг ёзишича, мазкур бинони моргга мослаштириш ишлари 2 апрель, пайшанба куни, бошланган. 800-1000 та жасадни қабул қилиши кутилаётган моргни 6 апрель кунидан ишга тушириш режалаштирилмоқда.
Март ойининг охирида Мадриддаги савдо марказларидан бирида жойлашган муз устида конки учиш учун мўлжалланган мажмуа коронавирусдан вафот этганларнинг жасадларини сақлаш учун фойдаланилиши маълум қилинган. Нью-Йорк кўчаларида эса коронавирусдан вафот этганларнинг жасадларини олиб чиқиб кетиш учун музлатгичли юк машиналари ўрнатилди.
Сўнгги маълумотларга кўра, дунёда коронавирусга чалинганлар сони 952 минг кишига етган, 48 мингдан ортиқ одам вафот этган, 202 минг бемор тузалишга муваффақ бўлган. Франция коронавирусдан энг кўп жабрланаётган мамлакатлар қаторига киради, мазкур мамлакатда тўрт мингдан ортиқ киши касалликдан вафот этган, мамлакатнинг бутун ҳудуди бўйлаб умумий карантин эълон қилинган.
Изоҳ (0)