Ижтимоий тармоқларда «Tarona rekords» асосчиси Равшан Йўлдошевнинг коронавирусдан вафот этгани ҳақида маълумотлар тарқатилмоқда. Ўзбекистонда сохта ахборотлар учун расмий манба ҳисобланувчи «Antifake» Telegram канали ушбу маълумотларнинг нотўғри эканлигини маълум қилди.
«Охирги вақтларда ижтимоий тармоқларда айрим аноним фойдаланувчилар томонидан ‘asia-times.org’ интернет нашрининг Ўзбекистонда коронавирус инфекциясидан одамлар ўлгани ҳақидаги, хусусан, машҳур шоу-бизнес вакили Равшан Йўлдошевнинг ҳам шу касалликдан вафот этгани тўғрисидаги ёлғон маълумотлар мақсадли равишда тарқатиляпти. Маълум қиламиз, мазкур материаллар ёлғон ва ҳақиқатга тўғри келмайди.
Аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш 66 миллион 900 минг сўмдан 89 миллион 200 минг сўмгача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади», — дейилади хабарда.
Эслатиб ўтамиз, Шаҳзоданинг собиқ турмуш ўртоғи, хонанда Лоланинг отаси, «Tarona rekords» компанияси асосчиси Равшан Йўлдошев 30 март куни юрак хуружидан вафот этган эди. Марҳум ҳаётининг сўнгги дақиқаларида унинг ёнида собиқ рафиқаси, хонанда Шаҳзода бўлган.
Изоҳ (0)