Самарқанд вилояти Пастдарғом туман ҳокимлиги томонидан 588 та шароити оғир хонадонга ун, ёғ, гуруч ҳамда макарон маҳсулотлари тарқатилди. Бу ҳақда «Дарё» мухбири Фарҳод Норбўтаев хабар бермоқда.
«Коронавирус пандемиясининг кириб келиши ортидан эълон қилинган карантин ҳолати боқувчисини йўқотган, эҳтиёжманд оилалар, ногирон ва беморларни ўйлантириб қўйди. Шу сабабли туман ҳокимлигининг ишчи гуруҳи маҳаллалар кесимида ана шундай оилалар рўйхатини шакллантирди. Бугун 588 та муҳтож оилага туман ҳокимлиги томонидан 30 тонна ун, 2940 литр ёғ, 3 тоннага яқин гуруч ҳамда макарон маҳсулотлари тарқатилди», — дейди туман ҳокимлиги ахборот хизмати раҳбари Олим Соннибоев.
Таъкидланишича, вилоятда картошкага бўлган эҳтиёжни қондириш мақсадида Бош прокуратура ҳузуридаги департаментнинг Самарқанд вилоят бошқармаси ташаббуси Тошкент шаҳар Чуқурсой божхона омборидан Россиядан импорт қилинган жами 35 тонна картошка олиб келинган. Вилоятнинг картошкага эҳтиёжи катта бўлган Ургут туманига 6,5, Иштихон туманига 4,5, Нарпай туманига 3,5, Оқдарё туманига 3,7, Пайариқ туманига 1,6, Булунғур туманига 1,5 ҳамда Самарқанд шаҳридаги бозорларга 5,5 тонна картошка етказиб берилган.
Шунингдек, вилоят дон корхоналари томонидан барча деҳқон бозорларида маҳаллий ун маҳсулотларини биржа нархларида сотиш ташкил қилиниб, ҳар бир бозорда кунига 2-3 тоннадан ун сотилмоқда.
Эслатиб ўтамиз, вилоятнинг Нарпай туманида ҳам аҳолига 10 тонна ун ва 4,5 минг дона қолипли нон бепул тарқатилганди.
Мавзуга доир:
- Фарғоналик тадбиркор томонидан 30 млн сўмлик озиқ-овқат маҳсулотлари, тиббий ниқоб ва шахсий гигиена воситалари бепул тарқатилди
- Қашқадарёлик ака-ука тадбиркор аҳолига 16 тонна ун, 3 тоннадан ёғ ва картошка, 10 минг дона тухум тарқатди
- Қашқадарёлик тадбиркор 3 тонна сабзавот ва 3 минг дона тиббиёт ниқобини аҳолига бепул тарқатди
Изоҳ (0)