Ижтимоий тармоқларда «Коронавирус бошқалар учун, мен учун эмас-ку! Бу ердан ҳозир секин чиқиб кетаяпман» дея карантиндан қочаётганини айтган фуқаронинг видеоси тарқалди.
Бу ҳақда «Дарё»га маълум қилган Бухоро ИИБ ахборот хизматининг ёзишича, ҳолат вилоятда содир этилган бўлиб, юқумли касалликлар шифохонасида карантинга олинган ушбу фуқаронинг ҳаракати юзасидан масъул ходимларга нисбатан хизмат текшируви бошланган.
Маълум бўлишича, жорий йилнинг 19 март куни «Москва—Тошкент» йўналишидаги поезд орқали Ўзбекистонга қайтган 30 ёшли бухоролик фуқаро Р.Ш. Қорақалпоғистон Республикаси Нукус шаҳридаги «Болалар марказий шифохонаси»да карантинга олинган. Аммо у 21 март куни ўзбошимчалик билан карантиндан қочгани учун унга нисбатан Жиноят кодексининг 25-моддаси (Жиноятга тайёргарлик кўриш ва жиноят содир этишга суиқасд қилиш) ҳамда 257/1-моддаси (Санитарияга оид қонун ҳужжатларини ёки эпидемияга қарши кураш қоидаларини бузиш) 1-қисми билан жиноят иши қўзғатилган эди. Айни пайтда тергов ҳаракатлари давом этмоқда.
Таъкидланишича, ижтимоий тармоқларда ушбу фуқаро билан боғлиқ иккита видео тарқалган.Фуқаро Р.Ш. дастлабки видеони Россияда бўлган вақтида тасвирга олиб, Telegram орқали дўстларига юборганини айтган бўлса, кейинги видеони Бухоро вилоятидаги карантинда сақлаш жойида олганини, уяли телефонини эса ички кийимларига яширган ҳолда олиб кирганини айтган.
Р.Ш.нинг мобил телефони ходимлар иштирокида ҳужжатлаштириб олинган. Фуқаро эса ҳозирда Бухоро вилоят юқумли касалликлар шифохонасининг алоҳида хонасида ИИБ ходимлари қўриқловида сақланмоқда.
Ҳозирда ҳолат юзасидан масъул ходимларга нисбатан хизмат текшируви ўтказилмоқда.
Эслатиб ўтамиз, Ўзбекистонда коронавирус инфекцияси аниқланган шахслар сони 5 нафарга ошиб, 172 кишини ташкил қилмоқда.
Изоҳ (0)