Тошкент ва Нукус шаҳарлари, вилоятлар марказларида 30 мартдан бошлаб шахсий транспорт воситаларининг ҳаракатига фақат махсус рухсатнома асосида рухсат этилиши ҳақида хабар берилган эди. Мазкур рухсатнома Давлат хизматлари агентлиги (ДХА) томонидан онлайн тартибда расмийлаштирилмоқда.
Агентлик томонидан маълум қилинишича, мазкур рухсатномани маҳсулот ва озиқ-овқат етказиб берувчи сифатида олиш учун BMW Х7 ва Mercedes-Benz каби премиум-класс автомашиналар эгаларидан аризалар келиб тушмоқда. ДХА директори Ҳалилулло Тўрахўжаев ана шундай аризаларни юбораётган фуқароларга илтимоснома йўллади.
Мурожаатда қайд этилишича, карантин даврида озиқ-овқат савдоси ва умумий овқатланиш корхоналарининг етказиб бериш хизматлари учун (курьерлик ва «доставка») автотранспортларга махсус рухсатномалар берилиши белгиланган. Бугунги кунда бундай тоифадаги аризалар сони 30 000 дан ортиқни ташкил этмоқда.
Айнан мазкур корхоналар томонидан премиум-классдаги автотранспорт воситаларига, шу жумладан, BMW Х7, Mercedes, Lexus, Hyundai, Captiva, Malibu-2, Tracker ва шунга ўхшаш машиналар учун ҳам курьерликни амалга ошириш мақсадида аризалар юборилмоқда.
Ушбу аризаларга илова қилинган ҳужжатлар қаторида мазкур тоифадаги автомашиналарнинг ҳайдовчилари курьер сифатида расмийлаштирилган иш берувчининг буйруғини тақдим қилмоқда.
«Мамлакатимизда ҳукм сураётган ушбу оғир кунларда бундай ишларни амалга оширишга ‘уддабурон’ тадбиркорларимизнинг виждонлари қандай қилиб йўл қўймоқда экан?
Айнан ушбу премиум-класс машиналар эгалари вирус тарқатувчи бўлиб чиқса-чи? Майли, пул учун ҳамма нарсага тайёр экансиз, ҳеч бўлмаса, яқинларингиз соғлиғи ҳақида ҳеч ўйлаб кўрдингизми? Ахир бу вирус ‘доминў эффекти орқали тарқалади-ку?
Premium-класс машиналарининг ҳайдовчилари ушбу маблағни ҳозирги шароитда қийналиб қолган эҳтиёжманд оилаларга сарф этсангиз, руҳиятингиз енгил тортармиди?», — дейилади агентлик раҳбарининг мурожаатида.
Маълум қилинишича, махсус рухсатномаларни расмийлаштириш учун Давлат хизматлари марказлари ходимлари тинмай меҳнат қилмоқда. Бунда ҳар бир ҳужжатнинг ҳаққонийлигига алоҳида баҳо бериш катта қийинчиликлар туғдирмоқда. Бунинг асосий сабабларидан бири айнан премиум-классдаги машиналар учун жўнатилган аризалар бўлмоқда.
«Айнан сиздек ‘ҳурматлиълар туфайли, ҳақиқатан ҳам, озиқ-овқат, дори-дармон, дон маҳсулотларини етказиб берувчилар тегишли рухсатномасини ўз вақтида ололмаяпти.
Балки сизда уят, виждон каби ҳис-туйғулар камроқ, худбинлик эса кўпроқдир, лекин сизни Жиноят кодексидаги жавобгарликнинг муқаррарлиги принципи нормалари ҳам қўрқита олмайдими? Инсонийлик ҳис-туйғулари ҳам шундай вазиятда уйғонмайдими?», — дейди ДХА директори.
Шунингдек, ғаразли мақсад йўлида ҳужжатларни сохталаштиришга жиноий жавобгарлик муқаррарлиги эслатиб ўтилган.
Аввалроқ Андижонда автотранспортдан фойдаланиш ҳуқуқини берувчи махсус рухсатномаларни сохталаштирган шахслар ушлангани ҳақида хабар берилган эди.
Мавзуга доир: Автотранспорт воситалари ҳаракатланишига махсус рухсатномалар талаб этилмайдиган ҳолатлар рўйхати эълон қилинди
Изоҳ (0)