O‘zbekistonda yetkazib berish xizmatlari uchun “inomarka”larga ruxsat olishga ariza berilmoqda. DXA rahbari ularga iltimosnoma yo‘lladi

Toshkent va Nukus shaharlari, viloyatlar markazlarida 30-martdan boshlab shaxsiy transport vositalarining harakatiga faqat maxsus ruxsatnoma asosida ruxsat etilishi haqida xabar berilgan edi. Mazkur ruxsatnoma Davlat xizmatlari agentligi (DXA) tomonidan onlayn tartibda rasmiylashtirilmoqda.

Agentlik tomonidan ma’lum qilinishicha, mazkur ruxsatnomani mahsulot va oziq-ovqat yetkazib beruvchi sifatida olish uchun BMW X7 va Mercedes-Benz kabi premium-klass avtomashinalar egalaridan arizalar kelib tushmoqda. DXA direktori Halilullo To‘raxo‘jayev ana shunday arizalarni yuborayotgan fuqarolarga iltimosnoma yo‘lladi.

Murojaatda qayd etilishicha, karantin davrida oziq-ovqat savdosi va umumiy ovqatlanish korxonalarining yetkazib berish xizmatlari uchun (kuryerlik va “dostavka”) avtotransportlarga maxsus ruxsatnomalar berilishi belgilangan. Bugungi kunda bunday toifadagi arizalar soni 30 000 dan ortiqni tashkil etmoqda.

Aynan mazkur korxonalar tomonidan premium-klassdagi avtotransport vositalariga, shu jumladan, BMW X7, Mercedes, Lexus, Hyundai, Captiva, Malibu-2, Tracker va shunga o‘xshash mashinalar uchun ham kuryerlikni amalga oshirish maqsadida arizalar yuborilmoqda.

Ushbu arizalarga ilova qilingan hujjatlar qatorida mazkur toifadagi avtomashinalarning haydovchilari kuryer sifatida rasmiylashtirilgan ish beruvchining buyrug‘ini taqdim qilmoqda.

“Mamlakatimizda hukm surayotgan ushbu og‘ir kunlarda bunday ishlarni amalga oshirishga ‘uddaburon’ tadbirkorlarimizning vijdonlari qanday qilib yo‘l qo‘ymoqda ekan?

Aynan ushbu premium-klass mashinalar egalari virus tarqatuvchi bo‘lib chiqsa-chi? Mayli, pul uchun hamma narsaga tayyor ekansiz, hech bo‘lmasa, yaqinlaringiz sog‘lig‘i haqida hech o‘ylab ko‘rdingizmi? Axir bu virus ‘domino’ effekti orqali tarqaladi-ku?

Premium-klass mashinalarining haydovchilari ushbu mablag‘ni hozirgi sharoitda qiynalib qolgan ehtiyojmand oilalarga sarf etsangiz, ruhiyatingiz yengil tortarmidi?”, — deyiladi agentlik rahbarining murojaatida.

Ma’lum qilinishicha, maxsus ruxsatnomalarni rasmiylashtirish uchun Davlat xizmatlari markazlari xodimlari tinmay mehnat qilmoqda. Bunda har bir hujjatning haqqoniyligiga alohida baho berish katta qiyinchiliklar tug‘dirmoqda. Buning asosiy sabablaridan biri aynan premium-klassdagi mashinalar uchun jo‘natilgan arizalar bo‘lmoqda.

“Aynan sizdek ‘hurmatli’lar tufayli, haqiqatan ham, oziq-ovqat, dori-darmon, don mahsulotlarini yetkazib beruvchilar tegishli ruxsatnomasini o‘z vaqtida ololmayapti.

Balki sizda uyat, vijdon kabi his-tuyg‘ular kamroq, xudbinlik esa ko‘proqdir, lekin sizni Jinoyat kodeksidagi javobgarlikning muqarrarligi prinsipi normalari ham qo‘rqita olmaydimi? Insoniylik his-tuyg‘ulari ham shunday vaziyatda uyg‘onmaydimi?”, — deydi DXA direktori.

Shuningdek, g‘arazli maqsad yo‘lida hujjatlarni soxtalashtirishga jinoiy javobgarlik muqarrarligi eslatib o‘tilgan.

Avvalroq Andijonda avtotransportdan foydalanish huquqini beruvchi maxsus ruxsatnomalarni soxtalashtirgan shaxslar ushlangani haqida xabar berilgan edi.