Қирғизистоннинг Бишкек шаҳри коменданти коронавирус тарқалишига қарши қўшимча чеклов чораларини жорий этди, деб хабар бермоқда Tengrinews 24.kg’га таяниб.
Қайд этилишича, куни кеча шаҳар комменданти Алмазбек Ўрозалиев бу борада тегишли буйруқни имзолаган. Хусусан, ўта зарур сабабларсиз шахсий автомобилда ҳаракатланиш тақиқланди.
«Шаҳар бўйлаб ҳаракатланиш тақиқланади. Фаолияти комендант томонидан тасдиқланган рўйхатга киритилган ташкилотлар ходимларининг ишга бориши ва уйга қайтиши бундан мустасно. Бунда иш жойидан маълумотнома бўлиши лозим. Шаҳар ҳаётини таъминлайдиган корхона ва ташкилотлардан ташқари барча корхона ва ташкилот фаолияти тўхтатилади», — деган у матбуот анжуманида.
Шунингдек, қариндошлар, танишлар, қўшниларни йўқлаш; оила аъзоларидан ташқари 3 кишидан ортиқ гуруҳ бўлиб тўпланиш ҳам тақиқланди. Вояга етмаганларнинг эса ота-оналарининг ҳамроҳлигисиз шаҳарда юриши ман этилди.
«Кўчада ўзининг ва бошқаларнинг ҳаётига хавф туғдирувчи одамлар кўплиги сабабли шундай чоралар кўришга мажбур бўлдик. Ўта зарур ҳолатларсиз ташқарига чиқманг. Акс ҳолда биз қонун доирасида чоралар кўрамиз», — деган Алмазбек Ўрозалиев.Қайд этилишича, Қирғизистонда коронавирусга чалиниш бўйича 94 та ҳолат аниқланди. Уларнинг 3 нафари тузалган, яна 3 нафари оғир аҳволда. Республиканинг Бишкек, Ўш, Жалолобод, Новқат ва Ўш вилоятининг Қорасув тумани ҳудудида фавқулодда ҳолат режими ва комендантлик соати жорий этилган.
Эслатиб ўтамиз, Қирғизистонда коронавирус юқтириб олиш бўйича биринчи ҳолат 18 март куни аниқланган. Мамлакатда 16 мартдан бошлаб барча мактаблар ва олий таълим муассасалари 3 ҳафтага карантинга ёпилган. Шунингдек, мамлакат ҳукумати коронавирус қайд этилган давлатларга борган хорижликларнинг мамлакатга киришини тақиқлаб қўйган.
Изоҳ (0)