Словакияда ҳозирда коронавирус тарқалишининг олдини олиш бўйича амалга оширилаётган чора-тадбирлар ҳолатида 110 кундан кейин касаллик энг юқори чўққисига чиқади, бунда касаллар сони 8 мингга етиши мумкин. Бу ҳақда мамлакат соғлиқни сақлаш вазири Марек Крайчига таяниб, «РИА Новости» хабар берди.
«COVID-19 коронавирусининг тарқалишига қарши қабул қилинган чора-тадбирлар муваффақиятли амалга ошириладиган бўлса, республикада касалликнинг юқори чўққиси 110 кундан кейин келади. Тахминларга кўра, мингга яқин одам сунъий нафас олдириш аппаратларига муҳтож бўлади ва вирус билан касалланган яна 7 минг киши шифохонага жойлаштирилади», — дейди вазир.
Сўнгги маълумотларга кўра, Словакияда коронавирус билан касалланганлар сони 336 кишига етган. 30 март куни мамлакат ғарбидаги Бойнице шаҳрида COVID-19 билан касалланган бемор вафот этган.
«Ҳозирда марҳумнинг жасадини ёриб кўриш натижасида олинган таҳлиллар жавоби кутиляпти. Бемор айнан нимадан вафот этганига аниқлик киритилади», — дейди Соғлиқни сақлаш вазирлиги матбуот котиби Зузана Элиашова.
Эслатиб ўтамиз, COVID-19 коронавируси ўтган йилнинг декабрь ойида Хитойнинг Хубэй провинциясида тарқалган эди. 12 март кунига келиб мамлакатда коронавирус пандемиясининг энг юқори чўққиси ортда қолгани маълум қилинганди. Бутун Хитой бўйлаб 82 мингдан ортиқ одам ушбу вирус билан касалланган, беморларнинг 90 фоизидан ортиғи соғайиб кетган.
Изоҳ (0)