Канадада жойлашган ва 40 миллион йил давомида фаолиятсиз бўлган Тинтин тектоник ёриғи уйғонмоқда. Бу ҳақда Виктория университети олимлари гуруҳи маълумот берди.
Олимлар ўзининг тегишли тадқиқот натижалари билан бўлишди. Улар миллионлаб йиллар давомида ҳаракатсиз бўлган ёриқда илгари кучли зилзилалар содир бўлганини аниқлади. Бу келажакда ҳам кучли зилзилалар юз бериши мумкинлигини кўрсатади.
Сўнгги ўн йилликларда Тинтин ёриғи бўйлаб 3-4 магнитудали бир нечта кичик зилзилалар қайд этилган, деди тадқиқотчилар.
Таъкидланишича, келажакда Тинтин ёриғи ҳудудидаги зилзилалар кучлироқ бўлиши ва 7,5 магнитудага етиши мумкин.
Ёриқ ҳар йили ўртача 0,2 дан 0,8 миллиметргача деформация тўплашда (ер қатламлари аста-секин силжишда) давом этмоқда ва шу сабабли келажакда зилзилалар хавфини туғдирмоқда, дейилади хабарда.
Тадқиқотчилар сунъий йўлдошлар, самолётлар ва дронлардан олинган янги юқори аниқликдаги топографик маълумотларни таҳлил қилиб, шундай хулосага келган.
Маълумот ўрнида, 30 июль куни Камчатка қирғоқларида 1952 йилдан бери энг кучли зилзила содир бўлди. Шундан сўнг Курил оролларига цунами ёпирилди. Зилзиладан сўнг Камчатка баландлик бўйича пасайди, шунингдек, жануби-шарққа 2 метрга силжиди. Камчатка Шимолий Америка плитасида жойлашган бўлиб, у ҳам ҳаракатланади. Ер силкинишлари Камчаткадаги Крашенинников вулқони отилишига туртки бўлди. Мазкур вулқондан лава охирги марта 1463 йилда отилган эди.
Изоҳ (0)