Қирғизистонда коронавирусдан дастлабки уч бемор соғайди. Уларнинг бари ўзбеклар

Қирғизистонда коронавирусдан дастлабки уч бемор соғайди, деб хабар бермоқда Turmush. Уларнинг бари ўзбеклар бўлиб, 1958, 1974, 1976 йилда туғилган.

Мамлакатнинг Жалолобод вилояти шифокорлари уларнинг 30 март, душанба куни, касалхонадан чиқарилаётганини видеога олган. Қайд этилишича, уларда, коронавирусга топширилган иккинчи таҳлилларида, вирус аниқланмаган. Фуқаролар касалхонада 14 кун давомида даволанган, ҳозирда аҳволи яхши.

Соғайган беморлар билан Жалолобод вилояти ваколатли вакили Нурболот Мирзаҳмедов ва Республика хавфли инфекциялар ва карантин маркази директори Собиржон Абдукаримов учрашган.

Касалхонани тарк этаётган шахслар юқумли касалликлар бўлими ва вилоят касалхонасининг барча ходимларига миннатдорлик билдирган.

«Аввалига жуда қўрққандик. Аммо шифокорлар хавотирга ўрин йўқлигини айтишди. Фуқаролардан касаллик белгилари пайдо бўлиши билан шифокорларга мурожаат қилишларини сўраймиз», — деган коронавирусдан соғайган беморлардан бири.

Эслатиб ўтамиз, Ўзбекистонда 30 март ҳолатига кўра, коронавирус инфекцияси билан касалланганлар сони 149 нафарга етди.