Фарғона вилоятидаги «Қувасойцемент» акционерлик жамияти мамалакатда коронавирусга қарши кураш учун 100 миллион сўм миқдоридаги маблағни хайрия қилди. Бу ҳақда Фарғона вилояти ҳокимлиги томонидан хабар берилди.
Маълум қилинишича, Ўзбекистон ҳукуматининг коронавирусга қарши курашдаги саъй-ҳаракатига ҳар томонлама кўмак бериш мақсадида 100 миллион сўм миқдоридаги пул маблағи «Меҳр-шафқат ва саломатлик» жамоат фондига ўтказиб берилган.
Аввалроқ ДХХ, Бош прокуратура ва МИБ ходимлари коронавирусга қарши кураш учун ўз маошларининг бир қисмини мазкур жамғармага ўтказиб берган эди. «Меҳр-шафқат ва саломатлик» фондига бир кунда 5 миллиард сўм маблағ йиғилгани, хусусан, номини ошкор қилишни истамаган биргина ташкилотнинг ўзи фондга 1 миллиард сўм ўтказиб бергани ҳақида хабар берилган эди.
Эслатиб ўтамиз, йиғилган маблағлар биринчи навбатда дори-дармон, тиббий анжомлар, дезинфекция, шахсий гигиена воситалари, касаллик профилактикаси бўйича тарғибот материалларига ишлатилади. Шунингдек, мазкур маблағлар тиббиёт муассасаларини қуриш, беморлар, карантиндагилар билан бевосита ишлаётган шифокорларни рағбатлантиришга ҳам йўналтирилади.
Изоҳ (0)