Туркиядан Ўзбекистонга импорт қилинган ҳамда илдизида зарарли организмлар бўлган 23 200 туп олма кўчати мамлакатга киритилмади ва ёқиб юборилди. Бу ҳақда «Ўздавкарантин» инспекцияси хабар берди.

Маълум қилинишича, Бухоро вилоятининг «Бухоро 2 ТИФ» ўсимликлар карантини чегара масканида Туркиядан импорт қилинган 23 200 туп олма кўчати Ўзбекистонга киритилмаган.

Туркиядан зарарли организм билан импорт қилинган олма кўчатлари Ўсимликлар карантини давлат инспекциясининг Марказий лабораториясига юборилган.

Экспертиза хулосасига кўра, кўчатларнинг илдиз қисмида Ўзбекистон учун карантиндаги бўртма нематода зарарли организми мавжудлиги аниқланган ва тегишли карантин чоралари кўрилиши юзасидан хулоса берилган.

Таъкидланишича, бўртма нематода помидор, бодринг, сабзи, пиёз, ғўза экинлари, гилос, ўрик ва бошқа турдаги мевали дарахтларни кучли зарарлайди. Бўртма нематода личинкаларининг ривожланиши натижасида ўсимлик бутунлай нобуд бўлади.

Айни пайтгача дунё бўйича бўртма нематодалар билан 2000 га яқин турли оилага мансуб маданий ва ёввойи ўсимликлар зарарланиши аниқланган бўлиб, бу ҳолат йил сайин ортиб бормоқда. Ҳудудга кириб келган нематода нафақат мавжуд ҳосилни нобуд қилади, балки суғориш, техника ва тупроқ орқали бошқа далаларга ҳам тарқалади.

«Ўздавкарантин» инспекциясининг тақдимномасига мувофиқ, олма кўчатлари келтирилган ҳудудда карантин ҳолати эълон қилинган ҳамда Бухоро вилоят Экология ва атроф-муҳитни муҳофаза қилиш бошқармасининг махсус полигонида тегишли ташкилотларнинг масъул ходимлари иштирокида мазкур кўчатлар ёқиш йўли билан йўқ қилинган.