Москва мэрияси коронавирус сабаб иш жойидан айрилган шаҳар аҳолисини ижтимоий қўллаб-қувватлаш мақсадида комплекс чора-тадбирларни ишлаб чиқди. Бу ҳақда шаҳар мэри Сергей Собянин хабар берди.
Хусусан, ҳукумат ишсизларга минтақавий компенсация тўлаш тартибини жорий этади. Ишсизлик учун бериладиган ва янги турдаги компенсациянинг умумий миқдори — ойига 19 500 рубль.
Таъкидланишича, тўловлар аризасиз, автоматик равишда белгиланади.
Шунингдек, Москва шаҳрининг барча аҳолиси учун уй шароитида изоляцияланиш режими жорий этилди. Унга кўра, москваликлар зарур эҳтиёж бўлмаганда ташқарига чиқишлари мумкин эмас.
Сўнгги маълумотларга кўра, Россияда COVID-19 коронавирус билан касалланганлар сони 1534 кишига етган.
Аввалроқ Россия COVID-19’ни даволашда фойдаланиши мумкин бўлган препарат номини эълон қилганди. Дунё бўйича коронавирусга чалинганлар сони 680 минг кишидан ошди, қурбонлар сони 31 мингдан зиёд. Ўзбекистонда 29 март Тошкент вақти билан соат 20:15 ҳолатига кўра, 144 киши касалланган, икки киши вафот этган, етти киши соғайган.
Изоҳ (0)