Москва шаҳрининг барча аҳолиси учун, ёшидан қатъи назар 30 мартдан бошлаб уй шароитида ўзини ўзи изоляциялаш режими жорий этилади. Бу ҳақда Россия пойтахти мэри Сергей Собянинга таяниб, «РИА Новости» хабар берди.
Таъкидланишича, қуйидаги ҳолларда квартирадан чиқишга рухсат берилади:
- Тез тиббий ёрдамга мурожаат қилиш ёки ҳаёт ва соғлиқ учун тўғридан-тўғри хавф туғдирувчи бошқа бирор хатар туғилганида;
- Ишга қатнаш учун;
- Яқин атрофда жойлашган дорихона ёки дўкондан харидларни амалга ошириш учун;
- Уй ҳайвонларини кўчада сайр қилдириш учун, бунда яшаш жойидан 100 метрдан узоқлашиб кетмаслик лозим;
- Чиқиндиларни олиб чиқиб ташлаш учун.
Кўчаларда ёки транспорт воситаларида ҳаракатланганида одамлар бир-биридан 1,5 метр оралиқ масофани сақлашлари керак. Таксилар бундан истисно.
Яқин кунлардан бошлаб кўчага фақат махсус рухсатнома билан чиқиш мумкин бўлади. У Москва ҳукумати томонидан белгиланган тартибга кўра, пойтахт аҳолисига тарқатилади.
«Яқин ҳафталар ичида уй режимига риоя қилинаётганини ва фуқароларнинг ҳаракатланишини назорат этувчи ақлли режим ишга туширилади. Аста-секин, лекин барқарор равишда биз ушбу вазият учун зарур бўлган назоратни кучайтирамиз», — дейди Сергей Собянин.
Таъкидланишича, уй режимида изоляцияланиш фуқароларнинг Москвага келиш ёки шаҳардан кетиш ҳуқуқларини чекламайди.
Шунингдек, шаҳар мери коронавирус сабаб иш жойидан айрилган москваликларга компенсация тўлаш тўғрисида буйруқ берган. Имтиёзлар ва янги тўловларнинг умумий миқдори ойига 19,5 минг рублни ташкил этади. Пуллар тўлаш аризасиз, автоматик тарзда белгиланади.
Мавзуга доир:
Изоҳ (0)