АҚШда автокинотеатрлар коронавирус сабаб яна оммалашмоқда

20—22 март кунлари АҚШдаги деярли барча кинотеатлар коронавирус пандемияси сабаб ёпилган эди. Умумий касса йиғимлари шу қадар паст бўлганидан студиялар ўз ҳисоботларини эълон қилмасликка қарор қилди. Deadline маълумотларига кўра, Pixar’нинг янги лойиҳаси — «Олға» мультфильми Американинг 135 кинотеатрида намойиш этилганига қарамай, 71 минг долларгина тўплай олган, деб хабар беради «Кинопоиск». Pixar мультфильмлари томоша қилинган 30 жойнинг 25 таси — автокинотеатрлар ҳисобига тўғри келмоқда.

Америка оммавий ахборот воситаларининг таъкидлашича, ушбу бизнес тўсатдан яна жонлана бошлаган. Одатдаги кинозаллардан фарқли ўлароқ, автокинотеатрларда томошабинлар фильмни очиқ осмон остида — машина салонидан томоша қилади. Бу каби майдончалар автотураргоҳ зонаси ва улкан экранга эга бўлади.

АҚШда илк автокинотеатрлар 1930 йилларда пайдо бўлган. Ушбу ғоя Нью-Жерси штатидан бўлган автомобиль сотувчи Ричард Холлингсхедга тегишли. Аввалига у бу каби томошаларни уйининг орқасида намойиш этган, 1933 йилга келиб, ғояни патентлаган. 1950 йиллар охирига келиб эса автокинотеатрлар машҳурликка эришган — ўшанда АҚШда 4063 та шу турдаги жойлар фаолият кўрсатган. 2019 йилнинг октябри маълумотларига кўра, автокинотеатрлар сони мамлакатда 305 тагача тушиб кетган.

17 март куни Калифорнияда жойлашган Paramount автокинотеатрига одатдагидан икки баробар кўпроқ томошабин ташриф буюрган. Томоша учун 136 автомобилга 360 та чипта сотилган. Шунингдек, Канзас, Оклахома ва Миссурида ҳам автокинотеатрларга бўлган қизиқиш ошгани сезилган.

Бунга пандемия вақтида автокинотеатрларнинг анъанавий кинотеатрлардан бироз бўлса-да хавфсизлиги сабаб қилиб кўрсатилмоқда. COVID-19 коронавируси тарқалганидан буён АҚШда 50 дан ортиқ одамнинг бир жойда тўпланиши тақиқланган.

Автокинотеатрларнинг мультиплекслардан ажралиб турувчи жиҳати ташриф буюрувчилар ўртасида алоқа бўлмайди, чунки уларнинг ҳар бири ёпиқ салонда ўтиради. Пандемия кучайгач, қўшимга чоралар ҳам киритилган. Ҳозирда Paramount автокинотеатрининг кассири ташриф буюрувчиларга қўлқоп тақиб хизмат кўрсатмоқда, машиналарнинг бир-бирига яқин қўйилиши тақиқланган. Айрим жойларда эса чиплаталар телефон орқали сканер қилинмоқда.