Хитойда ўтган бир сутка ичида коронавирусдан 3 киши вафот этди, касалланиш билан боғлиқ 54 та ҳолат аниқланди — уларнинг барчаси четдан юқтирилган, деб хабар беради «РИА Новости».
Мамлакатда умумий ҳисобда коронавирусни четдан юқтириш билан боғлиқ 649 та ҳолат қайд этилган.
«Соғлиқни сақлаш миллий комиссияси 31 та провинциядан (туманлар, марказга бўйсунувчи шаҳарлар) янги турдаги коронавирус билан жами 81 349 киши касаллангани ҳақида маълумот олди. Хусусан, ҳозирги вақтда 3128 киши даволанмоқда (921 нафарининг аҳволи оғир), 74 971 киши даволанишга муваффақ бўлган, 3295 бемор эса вафот этган», — дейилади хабарда.
Пандемия ўчоғи ҳисобланган Хубэй провинциясида эса ўтган бир сутка ичида коронавирусга чалиниш бўйича бирорта ҳолат қайд этилмаган, 367 кишига шифохонадан жавоб берилган, Уханда 3 киши вафот этган.
Гонконгда эса касалланиш бўйича 518 та ҳолат (тўрт киши вафот этган, 111 киши даволанган), Макаода 34 ҳолат (10 киши соғайиб кетган), Тайванда эса 267 ҳолат қайд этилган (икки киши вафот этган ва 30 киши тузалган).
Эслатиб ўтамиз, Хитой Ташқи ишлар вазирлиги 28 мартдан бошлаб дунё бўйлаб коронавирус пандемияси тарқалиши сабаб визаси бор ёки яшаш ҳуқуқига эга бўлган чет элликларнинг мамлакатга киришини вақтинча чеклади. Сўнгги маълумотларга кўра, АҚШда коронавирус билан касалланганлар сони 100 минг кишидан ошиб кетди, Ўзбекистонда эса вирусни юқтириб олганлар сони 104 кишига етди.
Изоҳ (0)