Қозоғистон президенти Қосим-Жўмарт Тоқаев Гулшара Абдуҳолиқовани Қизилўрда вилояти ҳокими этиб тайинлади, деб хабар беради «РИА Новости».
Президент маслаҳатчиси Ерлан Карин ўзининг Telegram’даги каналига «вилоят раҳбарлиги лавозимига биринчи бор аёл киши тайинланди», деб ёзиб қолдирган. «Аввалроқ Қозоғистон президенти Миллий кенгаш йиғилишида партия рўйхатининг 30 фоизини аёллар ва ёшлар ташкил этсин, деган ташаббусни илгари сурган эди», — дея қўшимча қилади Карин.
Абдуҳолиқова 54 ёшда бўлиб, бунга қадар Қозоғистон парламентининг қуйи палатаси депутати бўлган. Турли даврларда меҳнат ва аҳолини ижтимоий муҳофаза қилиш вазири, Қозоғистон президенти маслаҳатчиси, бош вазир ўринбосари, давлат котиби лавозимларида ишлаган.
Мавзуга доир: «Кимларгадир бу иш ёқмас, лекин менга ёқади». Шавкат Мирзиёев — аёлларнинг ҳоким этиб тайинланиши ҳақида
Изоҳ (0)