Bosch’нинг таркибий қисмларини етказиб берувчи компания коронавирусни аниқловчи экспресс-тестни яратди. Махсус қурилма ёрдамида дунёнинг исталган нуқтасидаги тиббиёт ходими 2,5 соат ичида ташхис маълумотларини олиши мумкин, дея хабар беради Motor. Одатдаги ҳолатда бунга бир-икки кун сарфланади.
Bosch Vivalytic қурилмаси Ирландиянинг Randox Laboratories технологик компанияси билан ҳамкорликда олти ҳафта ичида яратилди. Ушбу қурилма молекуляр ташхисни амалга оширишга мўлжалланган универсал ва тўлиқ автоматлаштирилган платформа кўринишида: шифокор бурун ёки томоқнинг шиллиқ қаватидан суртма олиб махсус катрижга жойлаштириши керак. Унинг ичида керакли реагентлар бўлиб, натижани чиқариб беради.
Bosch Vivalytic 95 фоиз аниқликка эга бўлиб, материалнинг тўлиқ таҳлилига 2,5 соат кетади. Қурилма нафақат коронавирусни, балки яна тўққизта респиратор касалликни аниқлашга қодир, жумладан, А ва B гриппларини ҳам. Бу турдаги қурилмаларнинг 100 донаси бир кунда ўртача 1000 та таҳлилни амалга оширади, бу эса инфекция тарқалишининг олдини олишга хизмат қилади.
Изоҳ (0)