Ўзбекистоннинг Брюссель шаҳридаги элчихонаси берган маълумотга кўра, 2020 йилнинг 16 мартидан бошлаб дипломатик ваколатхона ҳузурида 24 соатлик режимда Ўзбекистон фуқароларининг мурожаатларига тезкор жавоб қайтариш штаби фаолият кўрсатмоқда.
ТИВ матбуот хизматининг ёзишича, улар билан телефон ва интернет орқали доимий алоқада бўлиб турилибди, ижтимоий тармоқларда (Telegram ва WhatsApp) очилган каналларда ҳолат ҳақидаги долзарб ахборотлар мунтазам тарқатилмоқда ва зарурий консултатив ёрдам кўрсатилмоқда. Шунингдек, Бельгия, Нидерландия, Люксембург ва Дания расмий идоралари томонидан жорий қилинган карантин режимига амал қилиш бўйича батафсил тушунтириш берилмоқда.
Ҳозирда штаб томонидан ватанга қайтиш истагини билдирган Ўзбекистон фуқаролари рўйхати шакллантирилмоқда. Шу билан бирга дипломатик ваколатхона ўзбекистонликларни чартер рейс ташкиллаштириш масаласида бироз сабр қилишга ва ижтимоий тармоқларда фуқароларни чалғитувчи асоссиз маълумотларни тарқатмасликка чақирди.
Бенилюкс ва Дания ҳудудида бўлиб турган Ўзбекистон фуқароларининг визаларини узайтириш масалаларини тезкорлик билан ҳал қилиш мақсадида штаб мазкур давлатларнинг миграция хизматлари билан доимий алоқада бўлиб тургани эслатиб ўтилган.Аввалроқ ТИВ вазият таранглигича қолган Туркиядаги ўзбекистонликларга мурожаат қилиб, фуқароларни бироз сабрли ва матонатли бўлишга, тинчлик ва осойишталикни сақлашга чақирганди.
Изоҳ (0)