Бухорода карантин қоидаларини бузган 301 нафар фуқаро жавобгарликка тортилди. Бу ҳақда «Дарё»га вилоят ИИБ ахборот хизмати хабар бермоқда.
Маълум қилинишича, вилоятда эпидемияга қарши кураш ҳаракатлари олиб борилаётганига қарамай, карантин қоидаларига амал қилмаслик ҳолати бўйича 300 дан ортиқ маъмурий ҳуқуқбузарлик содир этилган.
Карантин вақтида 51 нафар тадбиркор кийим-кечак дўконида фаолиятини давом эттирган бўлса, 250 нафар фуқаро жамоат жойида ниқобсиз юргани аниқланган. Натижада уларнинг хатти-ҳаракати юзасидан маъмурий баённомалар тузилган.
Аниқланишича, жорий йилнинг 23 мартидан вилоятда 169 та тўйхона, 9 та истироҳат боғи, 29 та буюм бозори, 465 та ошхона, 45 та ресторан, 87 та кафе-бар, 66 та компьютер заллари ҳамда 4490 та савдо дўконларининг фаолияти вақтинчалик тўхтатилган.
Бундан аввал эса Тошкент, Самарқанд, Фарғона ва Гулистонда ниқобсиз юрган фуқаролар жаримага тортилгани ҳақида хабар берилган эди. Шунингдек, Олий суд матбуот хизмати жамоат жойларида ниқоб тақмаганларнинг қанча миқдорда жарима тўлаганини маълум қилганди.
Изоҳ (0)