Ўзбекистоннинг умумий ташқи қарзи 2020 йил 1 январь ҳолатига кўра, 24,4 миллиард долларни ташкил этди ҳамда 2019 йил бошига нисбатан 40,9 фоизга ёки 7,1 миллиард долларга кўпайди. Бу ҳақда Марказий банкнинг йиллик тўлов баланси шарҳида маълум қилинган.
Марказий банк ўтган йилда давлат қарзининг ортишини иқтисодиёт тармоқлари ва ҳудудларни ривожлантириш давлат дастурларини молиялаштириш учун янги ташқи қарзларнинг жалб қилингани билан изоҳлади.
2019 йил давомида қарзларнинг кўпайиши асосан давлат секторида кузатилган бўлиб, олинган қарз миқдори 5,7 миллиард долларни ташкил этган, шундан 1 миллиард доллари халқаро облигациялар ҳисобланади.
Хусусий секторнинг қарзлари банклар ва иқтисодиётнинг бошқа тармоқлари томонидан қарз олиш ҳажмининг ошиши натижасида 1,4 миллиард долларга кўпайди.
2019 йилда хусусий сектор умумий қиймати 2,8 миллиард долларга тенг қарзларни жалб қилди. Асосий қарз олувчилар банклар — 2,1 миллиард доллар, нефть-газ ва энергетика компаниялари — 208,2 миллион доллар, тўқимачилик — 131 миллион доллар ва бошқа соҳалардаги корхоналар — 391,2 миллион доллар.
Ўтган йилда давлат мос равишда 451,5 миллион доллар ва 294,7 миллион доллар миқдоридаги асосий қарз ва фоизларни тўлаган. Хусусий секторнинг ташқи қарз бўйича тўловлари асосий қарз сифатида 1,5 миллиард долларни ва фоизлар бўйича 411,8 миллион долларни ташкил этган.
Шу билан бирга, нефть-газ, энергетика ва банк секторидаги корхоналар асосий тўловлар ва фоизлар бўйича ҳам энг кўп тўловларни амалга оширишда давом этмоқда.
Эслатиб ўтамиз, 2020 йилнинг дастлабки икки ойида Ўзбекистоннинг ташқи савдо айланмаси 5,9 миллиард долларни ташкил этди. Мазкур даврда Ўзбекистон бир миллиард долларлик олтин сотди.
Изоҳ (0)