Ўзбекистонда коронавирус инфекцияси тарқалишининг олдини олиш мақсадида 16 мартдан барча таълим муассасалари қатори ОТМларда ҳам ўқиш тўхтатилиб, таътил эълон қилинган эди. Ижтимоий тармоқларда таътил эълон қилиниши ортидан контракт пулини тўламаган талабалар ўқишдан четлатилаётганлиги ҳамда талабаларга стипендия берилмаётгани ҳақида хабарлар тарқалди. Ўзбекистон Олий ва ўрта махсус таълим вазирлиги ушбу хабарлар юзасидан расмий баёнот берди.
Баёнотда қайд этилишича, карантин туфайли берилган таътил сабаб тўлов-шартнома шартларини бажаришга улгурмаган талабаларга (шу жумладан, 1-курснинг 2-ярми учун тўловларга) ректорлар томонидан қўшимча муддат берилади.
«Ижтимоий тармоқларда муҳокама қилинаётган «сўнгги муддат — 20 март» талабаларга эмас, балки 2019/2020-ўқув йилида бакалавриат ва магистратуранинг биринчи курсига тўлов-шартнома асосида талабаликка тавсия этилган ҳамда табақалаштирилган тўлов-контракт асосида ўқиш истагини билдирган абитуриентларга тааллуқли», — дейилади баёнотда.
ОТМда ўқув машғулотларига қатнаган ҳамда тўлов-контрактни 1-семестр учун тўламаганлар ҳам абитуриент мақомида ҳисобланади.
Мавзуга доир: Олий таълим вазирлиги карантин талабаларнинг ёзги таътили қисқаришига таъсир қилиши мумкинлигини билдирди
Республикадаги барча олий таълим муассасаларида талабаларга 2020 йил март ойи учун стипендиялар тўлаб берилган. Шу билан бирга, тўлов-контракт пулини тўламаганлиги, академик қарздорлиги, тегишли буйруқ расмийлаштирилмаганлиги ёки банк пластик картаси берилмаганлиги учун стипендия тўлашда кечикишларга йўл қўйилган ҳолатлар аниқланганлиги ҳам баёнотда қайд этилган.
Бу ҳолатларни ижобий ҳал қилиш учун ҳозирда вазирлик томонидан республика миқёсида стипендия тўланмаган талабалар ҳақида маълумот умумлаштирилиб, уларга нақд пул кўринишида тўланмай қолган стипендиялар талабанинг доимий яшаш жойига почта орқали юборилиши ёки туманлардаги банк филиаллари орқали рўйхат асосида тарқатилиши ҳамда банк пластик карталари орқали тўланиши, пластик карталар очилмаган талабаларга янги карталар очилиб, банк муассасасининг ҳудудий бўлими орқали етказилади.
Изоҳ (0)