Ўзбекистонда коронавирус тарқалишининг олдини олиш ва самарали даволаш чораларини кучайтириш мақсадида касалхоналар қурилаётгани хабар берилган эди. Соғлиқни сақлаш вазирлиги тез фурсатда коронавирус билан хасталанганларни даволаш ва карантин учун шундай шифохоналардан яна ўнга яқини қурилишини маълум қилди.

Фото: ССВ матбуот хизмати

Қайд этилишича, Тошкент шаҳрида 3 та замонавий ихтисослашган тиббиёт муассасалари бунёд этилмоқда. Чилонзор туманида янги қурилаётган 144 ўринга мўлжалланган шаҳар 3-сонли болалар юқумли касалликлар шифохонаси ва 158 ўринли шаҳар 4-сонли болалар кардиоревматология клиник шифохона бинолари яқин ойларда фойдаланишга топширилиши режалаштирилган.

Фото: ССВ матбуот хизмати

Шунингдек, Яшнобод туманида жойлашган Тошкент стоматология институтининг янги қурилаётган биносини 250 ўринли замонавий даволаш муассасасига айлантириш ишлари ҳам амалга оширилмоқда. Мазкур бино жорий йилнинг май ойида фойдаланишга топширилади.

Бундан ташқари, Тошкент вилояти Юқори Чирчиқ туманида карантин муассасасини бунёд этиш учун 55 гектар ер ажратилиб, жуда қисқа муддатда қуриб битказиш чоралари кўрилмоқда.

Фото: ССВ матбуот хизмати

Яна бир йирик муассаса Зангиота туманида қурилмоқда. Шу мақсадда туманда ажратилган 27 гектар ер майдонида ўн минг ўринли шифохона қурилиш ишлари давом этмоқда. Ушбу янги тиббиёт муссаса ҳам яқин фурсатда фойдаланишга топширилиши мўлжалланган.

Фото: ССВ матбуот хизмати

Шунингдек, вазирлик хабарида таъкидланишича, айни пайтда Андижон, Навоий ва Сурхондарё вилоятларида ҳам коронавирус билан касалланганлар ва уларнинг карантини учун худди шундай муассасалар қурилмоқда.

Фото: ССВ матбуот хизмати

Фото: ССВ матбуот хизмати

Эслатиб ўтамиз, Ўзбекистонда 28 минг нафардан кўпроқ одам карантинга олинган. 26 март ҳолатига кўра, коронавирус юқтириб олганлар сони 65 нафарга етган.