Ichki ishlar vazirligi tizimidagi Migratsiya va fuqarolik bo‘limlari hamda Yo‘l harakati xavfsizligi davlat xizmati 24-martdan boshlab karantin sababli fuqarolarni qabul qilishni to‘xtatdi. Bu davrda pasport rejimini buzgan va avtoransport vositasini texnik ko‘rikdan o‘tkazmagan fuqarolar jarimaga tortilmaydi. Bu haqda O‘zA xabar bermoqda.

Foto: “Daryo”

Agentlik tomonidan ma’lum qilinishicha, ichki ishlar vaziri o‘rinbosari Azizbek Ikromov Ichki ishlar boshqarmalari boshliqlariga tavsiyalar yuborgan. Ularga ko‘ra, karantin davrida pasport rejimini buzganlik va transport vositalarini texnik ko‘rikdan o‘tkazmaganlik uchun O‘zbekiston fuqarolari jarimaga tortilmaydi.

Migratsiya va fuqarolikni rasmiylashtirish bo‘limlari va Yo‘l harakati xavfsizligi davlat xizmati 24-martdan boshlab maxsus tavsiyalar kelmagunicha O‘zbekiston fuqarolarini, chet el fuqarolari va fuqaroligi bo‘lmagan shaxslarni, shuningdek, yuridik shaxslarni qabul qilishni to‘xtatdi.

Ma’muriy amaliyot, ekspertizalar, transport vositalarini ro‘yxatdan o‘tkazish va texnik ko‘rikdan o‘tkazish bilan bog‘liq ishlar vaqtincha to‘xtatildi.

Favqulodda holatlarda (pasport, ro‘yxatga olish, viza, ma’muriy amaliyot, imtihon olish, transport vositalarini davlat ro‘yxatidan va texnik ko‘rikdan o‘tkazish) fuqarolar alohida xonalarda sanitariya me’yorlariga rioya qilgan holda ichki ishlar organlari rahbarining ruxsati bilan qabul qilinadi.

Migratsiya va fuqarolikni rasmiylashtirish bo‘limlariga 24-martdan keyin pasport olish, yashash huquqini olish, propiskani almashtirish, rasmiylashtirish, viza va yashash huquqini uzaytirish uchun murojaat qilishni rejalashtirgan, ammo qabul to‘xtatib qo‘yilgani sababli bu ishlarni qila olmagan shaxslar pasport tizimi qoidalarini buzgan deb hisoblanmaydi. Ularga nisbatan ma’muriy choralar ko‘rilmaydi.

Avtotransport vositalarini davlat ro‘yxatidan va texnik ko‘rikdan o‘tkazmagan, shuningdek, jarimalarni o‘z vaqtida to‘lamagan haydovchilar vaqtincha jarimaga tortilmaydi.

Avvalroq Toshkent shahar IIBB va uning bo‘linmalari binolarida fuqarolar va yuridik shaxslarni qabul qilish vaqtincha to‘xtatilgani, notariuslar, Davlat xizmatlari markazlari va FHDYo idoralari 25-martdan onlayn ish rejimiga o‘tgani haqida xabar berilgan edi. Shuningdek, O‘zbekiston hududida 2020-yil 24-martdan boshlab joriy etilgan koronavirus infeksiyasi tarqalishiga qarshi kuchaytirilgan tartibga muvofiq, jahon axborot tarmog‘i va telefon aloqasi uchun to‘lovlar o‘z vaqtida amalga oshirilmaganligi sababli mazkur xizmatlarning ikki oy davomida o‘chirilishiga yo‘l qo‘yilmaydi.