Қашқадарё вилоятининг Шаҳрисабз шаҳрида хусусий клиника фаолиятини йўлга қўйган тадбиркорга вилоят соғлиқни сақлаш бошқармаси бошлиғи ўринбосари Ботир Жўраев томонидан босим ўтказилаётгани айтилмоқда.
Тадбиркорнинг таъкидлашича, 2018—2023 йиллар учун тузилган ижара шартномаси муддатидан олдин бекор қилиниб, фаолият юритиб турган бинодан ҳайдаб чиқарилмоқда.
Мазкур воқеани ўрганган «Дарё» мухбири Отабек Қўлдошевнинг ёзишича, тадбиркорга тегишли хусусий клиника Шаҳрисабз туман тиббиёт бирлашмасига қарашли, аммо фаолияти тўхтатилган Қорасув ҚВП биносида ижарада фаолият кўрсатади. Айни кунга келиб эса туман тиббиёт бирлашмаси мазкур бинога эҳтиёж сезиб, тадбиркорни бинодан чиқариш ҳаракатига тушган.
«2017 йил 6 июль куни Президентимиз раҳбарлигида республика соғлиқни сақлаш тизимида амалга оширилаётган ислоҳотлар ва нодавлат тиббиёт ташкилотларини ривожлантириш вазифаларига бағишланган мажлис бўлиб ўтган. Мажлис баёнига кўра, республикада бўлгани каби туманда ҳам бўш турган 29 та ҚВПдан бири — Қорасув ҚВП биноси 10 йилдан кам бўлмаган муддатга менга берилганди. Бино берилгач, фаолиятимни шу бинода давом эттирдим. Аммо ҳар ой белгиланган тартибда ижара тўловини амалга оширдим. Ваҳоланки, Президентимиз топшириғида бўш турган ҚВПлар биноси хусусий клиникаларга бепул берилиши лозимлиги белгиланганди. Шундай бўлса-да, Шаҳрисабз туман тиббиёт бирлашмасининг ўша пайтдаги раҳбари Ойбек Бўриев билан 2018—2023 йил учун тузилган 5 йиллик шартнома кўра, ижара пулини ҳам тўлаб келдим», — дейди «Сардор-Нур мед сервис» хусусий тиббиёт клиника раҳбари Нурали Шоимов.
Аниқланишича, туман тиббиёт бирлашма раҳбарияти Президент раҳбарлигида бўлиб ўтган мажлисдан сўнг туманда 29 та ҚВП фаолият кўрсатмаётганини, Қорасув ва Хўжахуросон ҚВПлари тўлиқ тугатилганлигини маълум қилган. Шунга кўра, бўш турган ҚВП бинолари нодавлат тиббиёт ташкилотларига бериб юборилган.
«Бинони қаровсиз ва кераксиз пайтда бизга беришди, эндиликда ишларимиз юришиб, бинони қайта жиҳозлаб, ўзимизга мослаштирган пайт тортиб олишмоқчи. Бўш бино керак бўлса, 3 та ҚВП биноси ҳувиллаб ётибди-ку», — дейди тадбиркор.
Қашқадарё вилоят соғлиқни сақлаш бошқармаси мазкур вазиятни изоҳлар экан, Шаҳрисабз тумани таркибидан Шаҳрисабз шаҳри ажралиб чиққач, туман тиббиёт бирлашмада бўш турган биноларга эҳтиёж ортган. Шу сабабдан ҳам вилоят соғлиқни сақлаш бошқармаси бошлиғи Дониёр Турсунов 2020 йил 23 январь куни соғлиқни сақлаш вазири ўринбосари Б.Юсупалиевга хат ёзиб, бинога эҳтиёж сезилаётганини, тадбиркор фойдаланиб келаётган бино 2020 йил 14 январдан бошлаб сил диспансерига берилиши лозимлигини сўрайди. Амалда эса 14 январда сил диспансери бинога кўчиб киришга улгурганди.
«Мен фаолият юритаётган бинони спид марказига бериш тўғрисида қарор чиқаришди. Шундан сўнг сил диспансери масъуллари «бинога биз ўтамиз» деб, хусусий клиникамни чиқариб юбормоқчи бўлишди. Туман прокуратурасига мурожаат қилганимдан сўнг тинч қўйишди. Энди эса 2019 йил сентябрдан бошлаб яна безовта қилишмоқда. Ҳатто кириш эшикларини бузиб, хоналардаги мебелларимни ҳам олиб чиқиб ташлашди », — дейди Нурали Шоимов.
Тадбиркор Нурали Шоимовнинг айтишича, бошқарма 2020 йил вазирликка хат берган бўлса-да, бинони тортиб олиш ҳаракати 2018 йил бошланган.
«2018—2023 йиллар учун тузилган беш йиллик шартномам бўлса-да, нархлар ошиши ҳисобга олиниб, ҳар йили ижара шартномасини янгилаб борардик. Туман тиббиёт бирлашмаси раҳбарияти мени ушбу бинодан чиқариш ҳаракатига тушгач, прокуратурага шикоят қилдим. Шундан сўнг масъуллар, жумладан, вилоят соғлиқни сақлаш бошқармаси бошлиғи ўринбосари Ботир Жўраев ҳам менга дўқ қилиб, ҳар қандай вазиятда ҚВП биносидан мажбурлаб чиқаришини айтди. Ва менга босим ўтказаётгани учун ‘олти марталаб’ жавоб беришини таъкидлади. Туман тиббиёт бирлашмаси эса 2020 йил учун шартнома тузишдан бош тортди. Шу сабабдан ҳам 2019 йил 10 декабрь куни соғлиқни сақлаш вазирлигига мурожаат қилиб, хусусий клиникам тақдири сўроқ остида қолаётганини айтдим», — дейди Нурали Шоимов.
Мазкур мурожаатга жавобан вазирлик ҳолатни ўрганиб, 2020 йил 14 январь куни туманда Қорасув ҚВПсидан ташқари Хўжахуросон, Оммағон, Шовкан ҚВП бинолари бўшлигини, Шаҳрисабз туман фтизиатрия диспенсери Шовкан ҚВП биносига кўчирилиб, хусусий тиббиёт ташкилоти — «Сардор-Нур мед сервис» билан шартнома тузиш тавсия этилади.
«Вазирлик тавсия қилган жой бизга тўғри келмайди. Боиси, биз Қорасув ҚВПга келишдан олдин бу жойларда бўлганмиз. Диспансеримиз аҳоли яшаш ҳудудидан узоқ масофада жойлашган бўлиши керак. Вазирлик тавсия қилаётган ҚВП биноларида бундай имконият йўқ. Битта Қорасув ҚВПси мазкур талабга жавоб беради. Аҳоли хонадонлари ҳам узоқ масофада жойлашган», — дейди Шаҳрисабз туман фтизатрия диспансери бош врачи Лобар Эргашева.
Ушбу ҳудудда яшовчи аҳоли вакилларидан бири Зафар Даминовнинг сўзига кўра, сил диспансерининг Қорасув ҚВП биносига кўчиб келиши аҳолига маъқул эмас.
«Номи билан сил диспансери, бу ерга келиб-кетувчи беморлар фарзандларимиз соғлиғига хавф туғдирмайди, деб ким кафолат бера олади? Аслида бу ҳудудга ҚВП керак», — дейди Зафар Даминов.
Вазирлик ўрганган хулосада айтилишича, Қорасув ҚВП туман тиббиёт бирлашмасидан 8-10 км узоқликда бўлса, Хўжахуросон ва Оммоғон ҚВП 18-20 км масофада. Шовкан ҚВП эса 2 км узоқликда жойлашган.
Маълум бўлишича, 2020 йил 14 январь куни Шаҳрисабз туман тиббиёт бирлашмаси бошлиғи Илҳом Шаропов Қорасув ҚВПсида фаолият юритаётган хусусий клиникани чиқариб юбориб, бинога Шаҳрисабз туман фтизатрия диспансерини киритиш ҳақида буйруқ чиқаради. Мазкур буйруқ хусусий клиника раҳбари ва диспансер ходимлари ўртасида келишмовчилик келтириб чиқаради. Вазият диспансер ходимлари ва бинодан чиқмаётган клиника раҳбарияти бир-бирини ҳақоратлашгача боради.
«Биз қонуний буйруққа кўра бинога кўчиб келдик. Тадбиркорга буни тушунтиришга уриндик, аммо фойдаси бўлмади», — дейди Лобар Эргашева.
Таъкидланишича, диспансерга юридик мақом берилгач ишчилар сони кўпайган. Аммо алоҳида бино берилмаган. Ўтган вақт давомида бир бинодан бошқа бинога кўчиб юрган.
«Биз ҳам алоҳида бинода фаолият юритишга ҳақлимиз, қолаверса, бу бино туман тиббиёт бирлашмаси балансида турибди, бинони ижарага бериш ёки бермаслик раҳбарият ихтиёрида. Раҳбарият ижарага беришни истамаётган бўлса, тадбиркор бинони тарк этиши лозим-да», — дейди Лобар Эргашева.
Нурали Шоимовнинг маълумот беришича, мазкур бинога кўчиб ўтгач, ўз маблағи ҳисобидан ичимлик суви келтирган. Хоналарни қайта жиҳозлаб, тиббиёт клиникасига мослаштирган. Аммо ижарага олувчи сифатида бу ишлардан ижара берувчини хабардор қилмаган.
«Бино берилгач, шарт-шароит оғирлигини кўриб, қараб туролмайман-ку. Таъмирлаб, хусусий клиникамга мослаштирдим, сув келтириб, қайта жиҳозладим», — дейди Нурали Шоимов.
Изоҳ (0)