Европа ва Осиё биржалари 24 мартда кунни ўсиш билан якунлади. АҚШда ҳам фонд савдолари асосий индексларнинг ўсиши билан ёпилди, дея хабар бермоқда Meduza.
Бир кунлик ўсиш суръати бўйича Dow Jones саноат индекси 1933 йилдан бери, S&P 500 кенг бозор индекси эса 2008 йилдан бери кузатилмаган рекордни этди. Ҳар иккала индекс мос равишда 11,4 фоиз ва 9,4 фоизга ўсган. NASDAQ индекси 8,1 фоизга кўтарилди.
The Wall Street Journal’нинг ёзишича, фонд бозорлари АҚШ Конгресси коронавирус эпидемияси шароитида қиймати икки триллион долларга тенг инқирозга қарши чоралар пакетини маъқуллашига умид қилиб, ўзига хос оптимизм кўрсатган.
АҚШ Конгресси кўриб чиқаётган Иқтисодий рағбатлантиришлар тўплами, жумладан, даромади белгиланган даражадан паст бўлган миллионлаб америкаликларга тўғридан-тўғри пул беришни назарда тутади. Бунда эҳтиёжмандларга 1200 доллардан ва ҳар бир фарзанди учун яна 500 доллардан пул берилади.
Демократлар кўзда тутилган тадбирлар касалхоналар ва ишсизларнинг етарли даражада молиялаштирилишини таъминлай олмайди, деб ҳисоблаб, инқирозга қарши чоралар пакетини маъқуллашни икки бор рад этган эди. Бироқ 24 март куни Конгрессдаги демократлар ва республикачилар пакетни тасдиқлаш арафасида эканлиги маълум бўлди.
Изоҳ (0)