Халқ таълими вазирлиги карантин вақтида ўқувчилар учун намойиш этиладиган видеодарслар бўйича тушунтириш берди

Ўзбекистонга коронавирус кириб келиши ортидан барча таълим муассасалари карантин учун ёпилган эди. Карантин вақтида мактаб ўқувчилари учун телеканаллар орқали видеодарслар намойиш этилиши маълум қилинган эди. Халқ таълими вазирлиги мазкур видеодарслар бўйича бир қатор масалаларга изоҳ берди.

Қайд этилишича, Халқ таълими вазирлиги ва миллий телерадиокомпания таркибидаги телеканаллар ҳамкорликда видеодарсларни суратга олиш ишларини олиб бормоқда. Бу ҳақдаги маълумотлар вазирликнинг ижтимоий тармоқлардаги саҳифаларида ва ОАВларда бериб борилди.

Видеодарслар яқин кунлар ичида «Оилавий», «Маданият ва маърифат», «Дунё бўйлаб» ва «Ёшлар» телеканалларида ҳамда Халқ таълими вазирлиги расмий сайти (www.uzedu.uz) ва ижтимоий тармоқлардаги саҳифаларида намойиш этилади.

Таъкидланишича, Халқ таълими вазирлиги ўқитувчиларга алоҳида видеодарслар тайёрлаш ва уларни тарқатиш бўйича ҳеч қандай кўрсатма бермаган. Ҳудудларда видеодарс олишга ўқитувчиларни норози қилган ҳолда жалб қилиш ва турли ҳужжатларни тўлдиришни талаб қилишга қатъиян чек қўйиш бўйича қўшимча топшириқлар берилган.Вазирликнинг маълум қилишича, агар юқорида келтириб ўтилган ҳолатлар ўқитувчилар билан содир бўлаётган бўлса ёки шу тўғрисида маълумот мавжуд бўлса, содир этилаётган ҳудуд ва мактабни аниқ кўрсатган ҳолда Халқ таълими вазирлигига мурожаат қилиш сўралади.