Тошкент шаҳридан 18 март, чоршанба куни, 100 га яқин енгил транспорт воситалари Андижон, Фарғона ва Наманган вилоятларига хайрия акцияси доирасида талабаларни манзилларига бепул етказиб қўйди. Бу ҳақда «Дарё» мухбири Мусулмонбек Иброҳимов хабар бермоқда.
Водий ҳокимликлари ва Транспорт вазирлигининг вилоят бошқармалари ҳамкорлигида Тошкент шаҳрида таҳсил олаётган талаба-ёшларни яшаш жойларига қайтариш учун Қўйлиқ массивидаги водийга қатновчи автомобиллар тураргоҳида махсус 100 га яқин енгил транспорт воситаларидан иборат хайрия акцияси ташкил этилди. Ушбу акциясида йўловчи ташиш билан шуғулланувчи тадбиркорлар ва шахсий автомобиль эгалари қатнашди.
Андижон вилояти транспорт бошқармаси бош инспектори Аҳрорбек Музаффаровнинг маълум қилишича, автомобиль тураргоҳига келишга имконияти бўлмаган талабалар учун ётоқхонасига алоҳида транспорт воситалари юборилган.
«Андижон вилоятидан 20 та автомобиль пойтахтимизга борди. Қўйлиққа келишга имконияти йўқ бўлган талабалар учун Талабалар шаҳарчаси ва Оҳангарон, Ангрен шаҳарларига 5 та автомобиль юбордик», — деди Аҳрорбек Музаффаров.
Бошқарманинг биринчи тоифали инспектори Фахриддин Исмоиловнинг айтишича, автомобилларнинг аксари ходимларнинг ўзиники.
«Бошқармада хизмат қилаётган инспекторлар ҳам ўзларининг шахсий автомашинаси билан хайрия акциясига қўшилди», — деди у.
Наманган транспорт бошқармаси бўлими бошлиғи Баҳодир Абдураимовнинг таъкидлашича, дастлаб акцияга 35 та енгил транспорт воситаси келтирилган бўлса, кейинроқ уларга яна 7 та автомашина эгалари ўз ихтиёрлари билан қўшилган.
«Йўлкира нархлари асоссиз қимматлаб кетишининг олдини олиш мақсадида йўловчи ташиш билан шуғулланаётган тадбиркорларимиз 2-3 тадан акцияга автомобиль ажратиб берди. Асосан, талабаларни текинга уйларига етказишни бошлаган эдик. Бўш жойлар ортиб қолса, кетишга моддий имконияти йўқ аҳолига ҳам бепул хизмат кўрсатдик. Ўртача ҳисобда 130 нафар йўловчи яшаш манзилига етказиб қўйилди. Улар асосан, Наманган шаҳар марказига олиб борилди», — дейди Баҳодир Абдураимов.
Фарғона вилояти транспорт бошқармасининг биринчи тоифали инспектори Мирзали Акбаровнинг айтишича, график асосда, куннинг биринчи қисмида, 20 та енгил транспорт воситаси Қўқон ва Фарғона шаҳарларига талабаларни олиб борган: «Кейин яна 15 та автомобилда талабаларни йўналиш бўйича манзилига етказиб қўйдик».
Суҳбат пайтида акция хизматидан фойдаланган талабалар бундан миннатдор бўлганликларини билдирди. Уларнинг кўпчилиги чегирмалар бўлишини кутганини, бепул етказиб қўйишларини эса кутмаганликларини айтиб ўтди.
Изоҳ (0)