Ўтган ҳафтада 200 минг нафардан кўпроқ кишида ўткир респиратор вирусли инфекциялар юқтириб олиш ҳолатлари кузатилган, беморларнинг 66 фоиз қисмини болалар ташкил этади. Бу ҳақда Украина соғлиқни сақлаш вазирлиги матбуот хизмати хабар берган.
Вазирлик мамлакатда грипп инфекциясининг ёйила бошлаганини тасдиқлаган, касалланиш кўрсаткичи эпидемия даражасидан 10 фоиз баландроқ.
Охирги етти кун давомида Украинада уч нафар одам грипп оқибатида вафот этган. Вазирлик баёнотига кўра, ўлганларнинг ҳеч бири гриппга қарши эмланмаган.
Украинада коронавирус инфекциясига қарши курашиш мақсадида 3 апрелга қадар карантин эълон қилинган. Мамлакатда ўқув муассасалари ёпилган, оммавий тадбирлар ўтказиш тақиқланган ва авиақатновлар тўхтатилган. Олий Рада коронавируснинг тарқалишига қарши курашга қаратилган қонунни қабул қилган. Ҳужжатга кўра, касаллигини билса ҳам одамлар билан мулоқотни давом эттирган ва атайин инфекция тарқатганларга нисбатан жиноий жавобгарлик белгиланади, карантин талабларига бўйсунмаган фуқаролар ва давлат хизматчиларига жарималар тайинлаш кўзда тутилган.
19 март ҳолатига кўра, Украинада COVID-19 коронавирусини юқтириб олганлар сони 16 нафарни ташкил қилади, икки киши инфекция келтириб чиқарган пневмония касаллиги оқибатида вафот этган.
Аввал Украина президенти Владимир Зеленский коронавирусга қарши кураш учун бизнесменлардан 500 миллион доллар сўрагани, шунингдек украиналикларга карантин вақтида демографияни кўпайтиришни маслаҳат бергани ҳақида хабарлар берилган.Бутун дунёда қарийб 220 минг нафар одам касалликни юқтириб олган; тузалганлар 85,7 минг нафар, вафот этганлар эса 9 минг нафарни ташкил қилмоқда.
Изоҳ (0)