Тошкентда 8 март куни бир аёлга тегишли BMW X5 ва Mercedes GLC ёниб кетгани ҳақида хабар берилган эди. Кейинроқ Ички ишлар вазирлиги мазкур ҳолат бўйича маълумот берган ва автомобиллар қасддан ёқиб юборилгани маълум бўлган эди.
Тошкент шаҳар ИИББ томонидан маълум қилинишича, ушбу ҳолат бўйича Ўзбекистон Республикаси Жиноят кодексининг 173-моддаси 2-қисми «в» банди билан жиноий иш қўзғатилган. Кўрилган чоралар натижасида, иккита автомобилни қасддан ёқиб юборганликда гумонланувчи 30 ёшли самарқандлик Турсин Э. ва Тошкент вилоятида яшовчи 26 ёшли Шаҳзод Ш. қўлга олинган.
Автомобильлар 8 март куни тахминан соат 05:30 да Миробод туманида ёқиб юборилган. Моддий зарар миқдори тахминан 225 000 доллар деб баҳоланган.
Эслатиб ўтамиз, Тошкентнинг Бунёдкор шоҳкўчасида 2020 йилнинг 9 январь куни юз берган ЙТҲда 777 рақамли BMW ёниб кетган эди. ЙТҲ оқибатида икки киши ҳалок бўлган. Воқеа жойидан қочиб кетган BMW’нинг маст ҳайдовчиси кейинроқ ушланган.
Изоҳ (0)