Maktabgacha ta’lim vazirligiga “Bolajon” va yana 3 ta telekanal video-mashg‘ulotlar uchun berilishi mumkin

Maktabgacha ta’lim vazirligiga “Bolajon” va yana 3 ta telekanal video-mashg‘ulotlar uchun berilishi mumkin. Bu haqda Agrippina Shin koronavirus infeksiyasi tufayli karantin davrida maktabgacha talim tizimida ko‘rilayotgan choralar xususidagi davra suhbatida ma’lum qildi.

“Biz bu borada ‘O‘zbekiston’ milliy teleradiokompaniyasi bilan ishlarni boshladik. Birinchi galda — bu ‘Bolajon’ kanali. Ammo rahbariyat bilan bizga yana 3 ta kanalni video-mashg‘ulotlarni uzatish uchun taqdim etilishini muhokama qildik”.

Shuningdek, metodistlar, yetakchi mutaxassislar tomonidan ota-onalarga uyda bolalari bilan mashg‘ulotlar olib borish, qo‘l mehnatiga asoslangan buyumlar yasash borasida ko‘mak beriladi. Maktabgacha ta’lim muassasasida karantin davrida ishlaydigan metodistlarning asosiy vazifasi ota-onalar bilan tushuntirish ishlarini olib borish, bolalar bilan bo‘sh vaqtlarini tashkil etish borasida tavsiyalar berishdan iborat bo‘ladi.Bundan tashqari, ular amaldagi masalalar, ish jarayonida to‘planib qolingan muammolar bilan shug‘ullanish, qog‘ozlar bilan ishlash, yangi rejalar tuzish, ish uslubida o‘zgarishlar qilish bilan mashg‘ul bo‘lishlari mumkinligi ta’kidlandi.

Eslatib o‘tamiz, maktabgacha ta’lim tarbiyalanuvchilari uchun 16-mart kunidan ta’til e’lon qilingan. Karantin shartli ravishda 31-martgacha davom etishi belgilangan. Ammo mazkur muddat Respublika maxsus komissiyasi tomonidan beriladigan buyruq bilan o‘zgarishi mumkin.