Хоразмда 58 минг оила камбағаллик бўсағасида кун кечирмоқда. Уларнинг 856 таси ўта ночор аҳволда

Президент Шавкат Мирзиёев 13 март куни Урганчда Хоразм вилояти фаоллари билан ўтказилган йиғилишда вилоятда 200 минг иш ўрни яратиш зарурлигини таъкидлади, дея хабар бермоқда Президент матбуот хизмати.

«Ҳудудда 58 минг оила камбағаллик бўсағасида кун кечирмоқда. Шундан 856 таси ўта ночор аҳволда. Кўплаб одамлар ишлаш учун хорижга кетган. Буларнинг барчасидан келиб чиқиб, Хоразмда 200 минг иш ўрни яратиш зарур», — дейилади Президент матбуот хизмати ахборотида.

Президент аҳолини тадбиркорликка жалб этган ҳолда янги корхоналар ва иш ўринлари яратиш, шу орқали камбағалликни кескин қисқартириш асосий мақсад эканини таъкидлаган. Туман ва шаҳарларда тадбиркорликни жадал ривожлантириш, банкларни «лойиҳалар фабрикаси»га айлантириш зарурлиги қайд этилган.

2,5 мингта бўш турган бинолар негизида ишлаб чиқариш ва хизмат кўрсатиш объектларини ташкил этиш, «Ҳазорасп» эркин иқтисодий зонасини янги лойиҳалар билан тўлдириш бўйича кўрсатмалар берилган. Қишлоқ туманларда пуллик хизмат кўрсатиш Урганч шаҳрига нисбатан 10-15 баробар пастлиги таъкидланиб, бундай объектларни кескин кўпайтириш кераклиги белгиланган.

Ўзбекистонда камбағалликни камайтириш дастури ишлаб чиқилиши ҳақида 2020 йил январида Президент Шавкат Мирзиёев парламентга Мурожаатномаси вақтида айтиб ўтган эди. Февраль ойида бўлиб ўтган видеоселектор йиғилишида эса Ўзбекистон аҳолисининг 4-5 миллион нафари камбағал экани, уларнинг бир кунлик даромади 10-13 минг сўм атрофида экани маълум қилинган эди.

Мамлакатда камбағалликни камайтириш учун 2020 йилнинг ўзида 700 миллион долларлик дастурлар амалга оширилиши кутилмоқда. Бу ишлар самарали ташкил этилиши учун ҳукумат таркибида ўзгаришлар амалга оширилиб, Жамшид Қўчқоров бош вазирнинг молия-иқтисодиёт ва камбағалликни қисқартириш масалалари бўйича ўринбосари этиб тайинланган эди.