Xorazmda 58 ming oila kambag‘allik bo‘sag‘asida kun kechirmoqda. Ularning 856 tasi o‘ta nochor ahvolda

Prezident Shavkat Mirziyoyev 13-mart kuni Urganchda Xorazm viloyati faollari bilan o‘tkazilgan yig‘ilishda viloyatda 200 ming ish o‘rni yaratish zarurligini ta’kidladi, deya xabar bermoqda Prezident matbuot xizmati.

“Hududda 58 ming oila kambag‘allik bo‘sag‘asida kun kechirmoqda. Shundan 856 tasi o‘ta nochor ahvolda. Ko‘plab odamlar ishlash uchun xorijga ketgan. Bularning barchasidan kelib chiqib, Xorazmda 200 ming ish o‘rni yaratish zarur”, — deyiladi Prezident matbuot xizmati axborotida.

Prezident aholini tadbirkorlikka jalb etgan holda yangi korxonalar va ish o‘rinlari yaratish, shu orqali kambag‘allikni keskin qisqartirish asosiy maqsad ekanini ta’kidlagan. Tuman va shaharlarda tadbirkorlikni jadal rivojlantirish, banklarni “loyihalar fabrikasi”ga aylantirish zarurligi qayd etilgan.

2,5 mingta bo‘sh turgan binolar negizida ishlab chiqarish va xizmat ko‘rsatish obyektlarini tashkil etish, “Hazorasp” erkin iqtisodiy zonasini yangi loyihalar bilan to‘ldirish bo‘yicha ko‘rsatmalar berilgan. Qishloq tumanlarda pullik xizmat ko‘rsatish Urganch shahriga nisbatan 10-15 barobar pastligi ta’kidlanib, bunday obyektlarni keskin ko‘paytirish kerakligi belgilangan.

O‘zbekistonda kambag‘allikni kamaytirish dasturi ishlab chiqilishi haqida 2020-yil yanvarida Prezident Shavkat Mirziyoyev parlamentga Murojaatnomasi vaqtida aytib o‘tgan edi. Fevral oyida bo‘lib o‘tgan videoselektor yig‘ilishida esa O‘zbekiston aholisining 4-5 million nafari kambag‘al ekani, ularning bir kunlik daromadi 10-13 ming so‘m atrofida ekani ma’lum qilingan edi.

Mamlakatda kambag‘allikni kamaytirish uchun 2020-yilning o‘zida 700 million dollarlik dasturlar amalga oshirilishi kutilmoqda. Bu ishlar samarali tashkil etilishi uchun hukumat tarkibida o‘zgarishlar amalga oshirilib, Jamshid Qo‘chqorov bosh vazirning moliya-iqtisodiyot va kambag‘allikni qisqartirish masalalari bo‘yicha o‘rinbosari etib tayinlangan edi.