Бразилия президенти Жаир Болсонарунинг коронавирус юқтириб олгани аниқланди. Бу ҳақда «ТАСС» хабар бермоқда.

Фото: «ТАСС»

Маълум қилинишича, Бразилия президентининг коронавирус бўйича топширган таҳлил натижалари ижобий чиққан. Бироқ президентда коронавирус аниқлангани ҳақида ҳозирча расман маълумот берилгани йўқ.

Қайд этилишича, Болсонарунинг АҚШ президенти Дональд Трамп билан бўлган учрашувида унга ҳамроҳлик қилган ходимда коронавирус аниқлангач, президент ҳам текширувдан ўтган. Бразилия президенти администрацияси ҳузуридаги жамоатчилик билан алоқалар котибияти раҳбари Фабио Вайнгартенда коронавирус аниқланган. Айнан у АҚШга амалга оширилган ташриф делегацияси таркибида бўлган. Оқ уй эса Фабио Вайнгартенда коронавирус аниқланган бўлса ҳам, Трампни текширишдан бош тортди.

Бразилияда коронавирус юқтириш билан боғлиқ биринчи ҳолат 26 февраль куни қайд этилган. Ундан бир кун олдин оммавий сайллар ва карнавал байрамлари бўлиб ўтган эди.

Бразилия Соғлиқни сақлаш вазирлиги маълумотларига кўра, мамлакатда айни пайтда вирус билан касалланганлар сони 76 кишига етган. Касалланганларнинг беш нафари шифохонада, қолганлари эса уй шароитида карантинда сақланмоқда. Бундан ташқари, 1500 киши «вируснинг эҳтмолий ташувчиси» сифатида кузатув остига олинган. Текширувдан ўтказилган 1100 дан ортиқ кишида вирус аниқланмаган.

Аввалроқ, Канада бош вазирининг рафиқасида коронавирус аниқлангани маълум бўлган эди. Эрон олий етакчисининг маслаҳатчиси коронавирус сабаб карантинга олинди. Путинни коронавирусдан ҳимоя қилиш учун барча зарур чоралар кўрилаётгани айтилди. Шунингдек, америкалик актёр Том Хенксда ҳам коронавирус аниқланган.

Бутун дунё бўйлаб коронавирус билан касалланганлар сони 128 минг кишидан ошиб кетди. Улардан 68 мингдан ортиғи даволанишга муваффақ бўлди, 4270 нафари вафот этган. Вируснинг энг йирик ўчоқлари Хитой (81 минг), Италия (12,4 минг), Эрон (10 минг), Жанубий Корея (7,8 минг), Франция, Испания ва Германия (2 мингга яқин) ҳамда АҚШ (987 нафар бемор) давлатлари бўлмоқда.