Хитойда коронавирус билан касалланиш бўйича дастлабки ҳолат декабрь ойида эмас, 17 ноябрда аниқлангани маълум бўлди. Бу ҳақда ҳукумат томонидан эълон қилинган маълумотларга таяниб, South China Morning Post хабар берди.
Таъкидланишича, мамлакатда биринчи бўлиб Хубэй провинциясида истиқомат қилувчи 55 ёшли фуқаро коронавирус билан касалланган. Ноябрь ойида Хитойда жами тўққиз киши вирус билан касалланган, бироқ ҳукумат касалликка чалинганларнинг бирортасини ҳозирча «нолинчи бемор» ёки биринчи касал деб айтмаган.
27 декабрь куни Хубэй провинциясидаги шифохоналардан бирининг шифокори Чжан Цзисянь янги касаллик коронавирус сабаб юзага келганини ва мамлакатда 180 киши уни юқтириб олганини маълум қилган.
Эслатиб ўтамиз, 2019 йилнинг 31 декабрь куни Хитой ҳукумати Жаҳон соғлиқни сақлаш ташкилоти (ЖССТ)га мамлакатнинг Ухань шаҳрида номаълум пневмония эпидемияси юзага келгани ҳақида хабар қилган эди. Февраль ойининг бошида Ухандаги госпиталда коронавирус хавфи ҳақида биринчилардан бўлиб огоҳлантирган шифокор Ли Венлян коронавирус оқибатида вафот этган эди.
Lancet тиббиёт журналида эълон қилинган тадқиқот натижаларига кўра, коронавирус инсон организмида 14 кундан кўпроқ — беш ҳафтага яқин ёки 37 кунгача сақланиши мумкин. Бу каби маълумотлар Ухандаги иккита юқумли касалликлар шифохонасидаги беморларни ўрганиш асосида олинган.
Мавзуга доир:
Изоҳ (0)